Көнчыгыш Азәрбайҗан Иран провинциясе Татарстан белән тыгыз икътисади һәм мәдәни хезмәттәшлек итү мөмкинлекләрен карый

Көнчыгыш Азәрбайҗан провинциясе (Иран Ислам Республикасы) Татарстан Республикасы территориясендә авыр һәм җиңел тракторлар җитештерүгә инвестицияләр кертү, нефть химиясе өлкәсендә уртак проектлар булдыру, Татарстан һәм Иран университетлары арасындагы хезмәттәшлекне җайга салу, шулай ук Казан һәм Тәбриз шәһәрләре арасында туры һава юлларын ачу мөмкинлекләрен карый.
Бу турыда бүген Татарстан Республикасы Министрлар Кабинетында Татарстан Премьер-министры Рөстәм Миңнеханов белән булган очрашуда Көнчыгыш Азәрбайҗан (Иран) губернаторы Әхмәт Әлириза Биги хәбәр итте.
Шуны да искәртик: Көнчыгыш Азәрбайҗан Иран провинциясенең Әхмәт Әлириза Биги җитәкчелегендәге делегациясе Казанга кичә, 14 нче гыйнварда, Татарстан Республикасы белән хезмәттәшлек итү мәсьәләләре турында фикер алышу өчен килде.
Кичә Казан ратушасында Казан һәм Тәбриз (Көнчыгыш Азәрбайҗан провинциясе, Иран) шәһәрләре арасында тугандашлык мөнәсәбәтләре урнаштыру турындагы Меморандумга кул куелды.
Бүгенге очрашуда Татарстан Республикасы Премьер-министры Рөстәм Миңнеханов билгеләп үткәнчә, “Россия Федерациясе җитәкчелеге Иран Ислам Республикасы белән сыналган дуслык сәясәтен үткәрә, һәм Татарстан, федерация субъекты буларак, Көнчыгыш Азәрбайҗан провинциясе белән хезмәттәшлек итүгә бик шат”.
Татарстан Хөкүмәте башлыгы сүзләренә караганда, “Иран өчен республикабызның әһәмияте һәм роле Казанда Иран Ислам Республикасының икеяклы мөнәсәбәтләрне җайга салуда тагын бер тоташтыручы буын булып тора торган генераль консуллыгы булу белән дә билгеләнә”.
Рөстәм Миңнеханов фикеренчә, төбәкләрнең дусларча мөнәсәбәтләре ике ил – Россия белән Иран – мөнәсәбәтләрен ныгытуга һәм тагын да тотрыклы итүгә китерә.
Көнчыгыш Азәрбайҗан (Иран) губернаторы Әхмәт Әлириза Биги әфәнде, үз чиратында, провинциядәге эшлекле даирәләр вәкилләренең Татарстанга хәзерге визитлары барышында Татарстанның техник һәм икътисади потенциалы, “Алабуга” махсус икътисади зонасы мөмкинлекләре белән танышуларын әйтеп китте. Татарстанга Көнчыгыш Азәрбайҗан провинциясе делегациясенең визиты нәтиҗәләре буенча эшлекле төркем оештырылачак, аның нигезендә уртак эшчәнлек турында бөтен ирешелгән килешүләр тормышка ашырылачак.