Белоруссия Республикасы Татарстан белән нефть чыгару һәм Универсиада-2013 кә спорт объектларын төзү өлкәсендә хезмәттәшлек итәргә тели

Бүген, 21 нче гыйнварда, Минскида Белоруссия Республикасы һәм Татарстан Республикасы (Россия) арасында 2009-2010 елларга хезмәттәшлекне үстерү чараларының хөкүмәтара беркетмәсенә кул куелды. Документка Татарстан Республикасы Премьер-министры Рөстәм Миңнеханов һәм Белоруссия Республикасы Премьер-министры Сергей Сидорский кул куйды.
2009-2010 елларга Татарстан һәм Белоруссия Республикасы арасында хезмәттәшлекне үстерү чаралары беркетмәсе ике якның да товар әйләнеше күләмен арттырырга, шулай ук хезмәттәшлек мөмкинлекләрен киңәйтергә мөмкинлек бирер дип уйланыла.
Документка Рөстәм Миңнеханов җитәкчелегендәге Татарстан Республикасы делегациясенең Белоруссиягә ике көнлек эшлекле визиты кысаларында кул куелды. 21 нче гыйнвар иртәсендә делегация Гомельдә булды, көннең икенче яртысында Белоруссия башкаласы Минскига китте.
Татарстан вәкилләре Белоруссия машина төзелеше комплексының кайбер предприятиеләрен – “Минск трактор заводы” РУПын, һәм “Минск автомобиль заводы” РУПын карап чыктылар.
Аннары Белоруссия Республикасының Хөкүмәт йортында хезмәттәшлекне үстерү буенча хөкүмәтара беркетмәгә кул кую тантанасы булды.
Сергей Сидорский Рөстәм Миңнеханов белән очрашу вакытында бүгенге көндә Белоруссиянең Татарстан белән нефть өлкәсендә хезмәттәшлек итәргә теләвен әйтте.
Белоруссия Премьер-министры Сергей Сидорский Татарстанның, Белоруссия кебек үк, куәтле нефть химиясе комплексын саклап калуын билгеләп үтте. “Нефть химиясе продукциясе Татарстаннан – Белоруссиягә, Белоруссиядән Татарстанга килеп торсын өчен, без кулдан килгәннең барысын да эшлибез. Бу – каучук, металлокорд һәм башка продукция”, - диде Сидорский әфәнде.
Очрашу кысаларында “Татнефть” ААҖ нең Белоруссиядәге урынын киңәйтү буенча әлеге нефть чыгару компаниясенең тәкъдимнәре, шул исәптән автомобильләргә ягулык салу станцияләре челтәрен төзү мәсьәләсе каралды.
Моннан тыш, Сергей Сидорский 2013 елда Казанда узачак 27 нче Бөтендөнья җәйге универсиадасын әзерләүдә Белоруссия предприятиеләренең катнашуы турында да фикер алышырга тәкъдим итте. Шуны да искәртик: бүгенге көндә Белоруссия шушындый ук юнәлештә Россиянең Краснодар крае белән хезмәттәшлек итә. Ул Сочидагы кышкы Олимпиада өчен спорт объектларын төзүдә катнашачак.
Тышкы икътисади эшчәнлек буенча Татарстан Премьер-министры ярдәмчесе Искәндәр Мөфлиханов хәбәр иткәнчә, иртәгәгә, ягъни 22 нче гыйнварга, Татарстан делегациясе әгъзаларының Минскидагы кайбер заманча спорт объектларына – велотрекка, футбол мәйданына һәм стадионнарның берсенә баруы билгеләнгән. Иртәгә Татарстан делегациясен Белоруссия Премьер-министры Сергей Сидорский озатып йөрер дип көтелә.