Татарстанда быел мәктәпкәчә яшьтәгеләр өчен 10 меңнән артык урын булдырылачак

2014 елның 31 гыйнвары, җомга
2014 елда Татарстанда мәктәпкәчә балалар учреждениеләрендә 10 меңнән артык урын булдырылачак. Бүген бу хакта ТР Мәгариф һәм фән министрлыгының киңәйтелгән коллегия утырышында ведомство башлыгы Энгель Фәттахов хәбәр итте. Коллегия эшендә Татарстан Республикасы Премьер-министры Илдар Халиков, Дәүләт думасы депутаты, РФ Дәүләт думасының мәгариф буенча комитет әгъзасы Илдар Гыйльметдинов катнашты.

Энгель Фәттахов билгеләп үткәнчә, республикада өч еллык зур программа – мәктәпкәчә балалар учреждениеләрендә яңа урыннар булдыруны гамәлгә ашыру башланган. 2016 елга барлыгы 30 меңнән артык яңа урын булачак.

Министр мәктәпкәчә белем бирү проблемалары арасында ясле төркемнәренең саны кимүен атады.
“Муниципаль берәмлекләргә 3 яшькә кадәрге балалар өчен мәктәпкәчә төркемнәр челтәрен саклау өчен барлык чараларны кулланырга кирәк”,- дип ассызыклады ул.

Э. Фәттахов шулай ук балалар бакчалары педагогик кадрларының квалификациясен стандарт таләпләренә туры китереп күтәрү буенча эшләр булачагын хәбәр итте. Моннан тыш, хәзер иң яхшы балалар бакчалары җирлегендә һәр муниципаль берәмлектә мәктәпкәчә белем бирүнең федераль дәүләт белем бирү стандартын этаплап кертү буенча тәҗрибә мәйданчыклары булдырылды.

ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International