Татарстан Хөкүмәте башлыгы Рөстәм Миңнеханов Россия делегациясе составында Давостагы икътисади форумда катнаша

Бүген, 28 нче гыйнварда, Татарстан Республикасы Премьер-министры Рөстәм Миңнеханов, халыкара икътисади форумда катнашу өчен, Россия Федерациясе делегациясе составында Давоска (Швейцария) килде.
2009 елгы Давос форумында катнашучылар фикер алышачак төп тема – дөньякүләм икътисади кризис нәтиҗәләре. Якынча исәпләүләр буенча, форум 40 тан артык дәүләт һәм милли хөкүмәт башлыкларын, 60 министрны, өч дистәдән артык алдынгы халыкара оешма вәкилләрен җыячак. Давос-2009ны рәсми рәвештә ачып җибәрүгә кадәр үк, аналитиклар “1971 елда форум үз эшен башлап җибәргәннән бирле мондый ажиотаж булмавын” әйткәннәр иде.
Россия Федерациясенең рәсми делегациясен илнең Премьер-министры Владимир Путин җитәкли. Аннан тыш, Давоска Россия Федерациясенең беренче вице-премьеры Игорь Шувалов, Россия Федерациясенең икътисади үсеш министры Эльвира Нәбиуллина, шулай ук Анатолий Чубайс (Роснано), Андрей Костин (ВТБ), Олег Дерипаска (БАЗЭЛ), Вагит Алекперов (ЛУКОЙЛ), Александр Изосимов (“ВымпелКом”) Россия вәкиле булып килгән.
2009 елгы Давос икътисади форумының эше 1 нче февральгә кадәр дәвам итәчәк.