Татарстан Премьер-министры Рөстәм Миңнеханов: “Республика Хөкүмәте “Алабуга” махсус икътисади зонасын үстерүне өстенлекле юнәлешләрнең берсе дип саный”

Бүген Татарстан Республикасы Министрлар Кабинетында Татарстан Республикасы Хөкүмәте башлыгы Рөстәм Миңнеханов һәм “Махсус икътисади зоналар” ААҖ генераль директоры Сергей Левкин “Алабуга” махсус икътисади зонасын (Татарстан Республикасы) үстерү Концепциясе һәм аны табышлы итү чаралары турында фикер алыштылар.
Рөстәм Миңнеханов билгеләп үткәнчә, әлегә “Алабуга” махсус икътисади зонасын алга таба үстерү мәсьәләләрендә республика һәм федераль структуралар арасында бернинди каршылыклы фикер килеп чыкмаган. Аның сүзләренә караганда, “ихтыяҗлар балансы төзелгән”, һәм Татарстан Республикасы Хөкүмәте “Алабуга” махсус икътисади зонасын республика икътисадындагы өстенлекле юнәлешләрнең берсе дип саный.
Үз чиратында, Сергей Левкин мондый проектлар тормышка ашырыла торган башка федерация субъектлары белән чагыштырганда, Татарстанда махсус икътисади зонаны үстерү резидентлар өчен территория әзерләү темплары буенча да, резидентларны җәлеп итү буенча да шактый уңышлы баруын билгеләп үтте.
2008 елда проектны үстерү нәтиҗәләре турындагы доклад белән “Алабуга” сәнәгый-җитештерү тибындагы махсус икътисади зонасы” ААҖ нең генераль директоры Василий Кудряшов чыгыш ясады.
Ул 2009 ел планнарына, 3,149 млрд. сум алып, беренчел чираттагы инфраструктураны төзү эшләрен тулысынча төгәлләү кертелүен әйтте.
Шуны да искәртик: хәзерге вакытта “Алабуга” махсус икътисади зонасы территориясендә 8 резидент компания теркәлгән. Шуларның икесе генә - “Соллерс-Алабуга” һәм “Северстальавто-Исудзу” уртак производствосы – продукцияне уңышлы җитештереп килә. Шул рәвешчә, төзелгән инфраструктура һәм энергетик егәрлекләр бар көченә эшләми, бу амортизация һәм эксплуатация чыгымнары буенча кайбер проблемалар китереп чыгара.
Киңәшмәдә катнашучылар “Алабуга” махсус икътисади зонасын табышлы итү буенча конкрет чаралар комплексы турында фикер алыштылар. Фаразлауларга караганда, бу 2012 елда, зонаның резидент компанияләре күрсәтелгән проект егәрлекләренә ирешкәч тормышка ашырылачак.
Киңәшмәдә Махсус икътисади зоналар белән идарә итү Федераль агентлыгының Татарстан Республикасындагы территориаль идарәсе җитәкчесе Игорь Носов, Татарстан Республикасының төзелеш, архитектура һәм торак-коммуналь хуҗалык министры Марат Хөснуллин, “Татинвест-гражданпроект” дәүләт унитар предприятиесе генераль директоры – Татарстан Республикасының төзелеш, архитектура һәм торак-коммуналь хуҗалык министры урынбасары Ирек Фәйзуллин, Татарстан Республикасы Кече һәм урта эшмәкәрлекне үстерү комитеты рәисе Тимур Шаһивәлиев катнашты.
Киңәшмә бетүгә, Сергей Левкин җирле массакүләм мәгълүмат чаралары вәкилләренең сорауларына җавап бирде.