Татарстан Премьер-министры Рөстәм Миңнеханов: “Харбинда XXIV кышкы Универсиада үрнәк булырлык итеп оештырылган”

Харбиндагы XXIV кышкы Универсиаданың оештырылуы, бу чараның зурлыгы – үрнәк булырдай. Кичә, 18 нче февральдә, Кытай телеканалларының берсенә биргән интервьюсында бу турыда Татарстан Республикасы Премьер-министры Рөстәм Миңнеханов әйтте.
Шуны искәртик: Татарстан Хөкүмәте башлыгы һәм Татарстан Республикасыннан килгән башка кайбер рәсми затлар 2009 елның 18 нче февралендә Харбиндагы (Кытай) XXIV кышкы Бөтендөнья студентлар уеннарын ачу тантанасында катнаштылар.
2009 ел кышкы Универсиадасында 50 дән артык илдән, шул исәптән Россиядән килгән студентлар катнаша. Россия җыелма командасы составына Татарстан Республикасы студентлары да кергән.
“Кышкы Универсиаданы оештыру мәсьәләсендә Кытай коллегаларыбызга тиешле бәя бирергә кирәк, - диде Рөстәм Миңнеханов. – Алар моңа күп көч салганнар”.
Татарстан Премьер-министры сүзләренә караганда, “Кытайда студентлар спортына керткән хезмәт, спорт инфраструктурасы, гомумән, спортка мөнәсәбәт – үрнәк булырлык”. Ул шулай ук кышкы Универсиада-2009 ның югары дәрәҗәдә оештырылуын билгеләп үтте.
Кытайга визиты кысаларында Татарстан Премьер-министры Рөстәм Миңнеханов Халыкара студентлар спорты федерациясе (FISU) президенты Джордж әфәнде Киллиан белән очрашу үткәрде.
Очрашуда шулай ук Татарстан Республикасының яшьләр эшләре, спорт һәм туристлык министры Марат Бариев, Казан мэры Илсур Метшин, тышкы икътисади эшчәнлек буенча Татарстан Республикасы Премьер-министры ярдәмчесе Искәндәр Мөфлиханов, FISU ның башкарма комитет әгъзасы – Россия студентлар спорт союзы Президенты Олег Матыцин, Казанда узачак Универсиада-2013 не оештыру комитеты әгъзалары катнашты.