Татарстан Республикасы һәм “Хьюлетт-Паккард” хезмәттәшлекне дәвам итәргә уйлый

Бүген Татарстан Республикасы Министрлар Кабинетында Татарстан Республикасы Премьер-министры Рөстәм Миңнеханов “Хьюлетт-Паккард” (HP) компаниясенең Россиядәге генераль директоры Оуэн Кристофер Кемп белән очрашты.
Очрашуда шулай ук Татарстан Республикасының икътисад министры Марат Сафиуллин, мәгълүматлаштыру һәм элемтә министры Фәрит Фазылҗанов, Татарстан Республикасы Министрлар Кабинетының мәгълүмати-аналитик бүлек башлыгы Александр Юртаев, Татарстан Республикасы Мәгълүмати технологияләр үзәгенең генераль директоры Николай Никифоров һәм аның урынбасары – Татарстан Республикасы Министрлар Кабинеты Аппаратының мәгълүмати коммуникацияләр, мәгълүматны саклау һәм материаль-техник тәэмин итү бүлеге башлыгы Айрат Хәйруллин һәм башка рәсми затлар катнашты.
“Республикага, үз алдына куйган зур бурычларны тормышка ашыру өчен, стратегик партнерлар арасында дөньякүләм танылган җитди компанияләр булдырырга кирәк. “Хьюлетт-Паккард” компаниясе һәм Татарстан бүгенге көндә ышанычлы партнерлар булып торалар һәм алар уртак проектларны тормышка ашырырга әзер”, - дип билгеләп үтте очрашу барышында Рөстәм Миңнеханов.
Премьер-министр Татарстан белән НР компаниясе арасындагы хезмәттәшлекнең төп юнәлешләрен аерып күрсәтте. Барыннан да элек, бу - мәгълүмати технологияләрне дәүләти, сәнәгый һәм иҗтимагый секторларда, мәгариф һәм кадрлар әзерләү өлкәсендә куллану; компаниянең Казанда төзелеп ята торган ИТ-технопарк һәм Универсиадага әзерлек проектларында катнашуы.
Кемп әфәнде әлеге проектлар белән кызыксынуын һәм компаниянең киләчәктә дә республика белән хезмәттәшлек итәргә һәм Татарстанның югары уку йортлары белән эшне тагын да киңрәк җәелдерергә җыенуын әйтте. “Хьюлетт-Паккард” республика белән инде берничә ел хезмәттәшлек итә. 2005 елда Татарстан Республикасы Хөкүмәте һәм НР компаниясе мәгълүмати технологияләрне үстерү өлкәсендә ниятләр турындагы беркетмәгә кул куйды. Ә 2006 елда Казанда НР ның Россия төбәкләрендәге 7 нче офисы ачылды. Россиядә компаниянең 11 вәкиллеге бар.
Бүгенге көндә НР Татарстанда “Татнефть” ААҖ, “Казаноргсинтез” ААҖ, “Нижнекамскнефтехим” ААҖ кебек зур сәнәгый предприятиеләр белән уртак проектларны, КДУ да цифрлы тигезсезлекне җиңү программасын тормышка ашыра, ә НР җиһазлары һәм программа тәэминаты “Татарстан Республикасы Электрон Хөкүмәте” проектын гамәлгә ашыруда кулланыла.
Оуэн Кемп уртак проектларның тагын да күбрәк булырга мөмкин икәнлеген әйтте. “Татарстанда моның өчен кирәкле бөтен ресурслар, уңайлы икътисади һәм бизнес-климат бар”, - диде ул.