Татарстан Премьер-министры Илдар Халиков “Россельхозбанк” ААҖ идарәсе рәисе урынбасары Кирилл Левин белән очрашты

Татарстан Республикасы Премьер-министры Илдар Халиков һәм “Россельхозбанк” ААҖ идарәсе рәисе урынбасары Кирилл Левин бүгенге очрашуда эшмәкәрләргә дәүләт ярдәме чаралары турында фикер алыштылар. Очрашу Татарстан Республикасы Хөкүмәте Йортында узды, анда “Россельхозбанк” ААҖнең Кече бизнес департаменты вәкилләре, шулай ук ТР Авыл хуҗалыгы һәм азык-төлек министрлыгы, ТР Икътисад министрлыгы вәкилләре катнашты.

Илдар Халиков, аерым алганда, “Россельхозбанк” ААҖ җитәкчелегенең Казанга килүе киләчәктә мөнәсәбәтләрне ныгытуга ярдәм итәчәк, дигән ышаныч белдерде.
“Бүгенге көндә кече һәм урта эшмәкәрлеккә ярдәм кирәклеген дәүләт хакимияте органнарыннан тыш, эшмәкәрләр белән эшләүче структуралар, аеруча банкларның аңлавы безнең өчен бик мөһим”, - диде Илдар Халиков. Аның сүзләренчә, бүген кече һәм урта эшмәкәрлек– ул эш урыннары, гарантияле хезмәт хакы, бу гомумән гражданнарның социаль якланган булуын һәм дәүләтнең тотрыклылыгын тәэмин итә. Татарстанда бу мәсьәләгә һәрвакыт җитди игътибар бирелде, диде ул.

Үз чиратында, Кирилл Левин, “Россельхозбанк” ААҖ белгечләре кече һәм урта эшмәкәрлек үсеше картасын өйрәнеп, эшмәкәрлек зур җитештерү һәм зур предприятиеләр булган урыннарда актив үсеш ала дигән нәтиҗәгә килделәр, дип белдерде.

Очрашуда ике яктан да катнашучылар “Россельхозбанк” ААҖ нең республиканың инвестиция проектларында катнашуын, шулай ук банкның “Татарстан Республикасы гарантия фонды” коммерцияле булмаган оешма белән хезмәттәшлеге турында фикер алыштылар.

Искә төшерәбез, “Россельхозбанк”ның Татарстан филиалы матбугат хезмәте хәбәр иткәнчә, республиканың авыл хуҗалыгы җитештерүчеләренә быелгы кыр эшләрен уздыру өчен 5,3 млрд. сум бүлеп бирүне планлаштыра. 2013 елның декабреннән “Россельхозбанк” филиалы бу максатлар өчен 56 предприятиегә 1,8 млрд. сумлык кредит биргән. Март уртасы мәгълүматлары буенча, Татарстанның авыл хуҗалыгына кредит бирүдә “Россельхозбанк”ның өлеше 37% тәшкил итә.