Дмитрий Рогозин: “Россиядә Европа культуралы производство булдыру мәсьәләсе бик кискен тора”

Бүген Чаллы шәһәренең ИТ-паркында РФ Хөкүмәте рәисе урынбасары Дмитрий Рогозин җитәкчелегендә РФ Хөкүмәте каршындагы Хәрби-сәнәгать комиссиясенең күчмә утырышы булды. Киңәшмәдә “Ростех” дәүләт корпорациясенең генераль директоры Сергей Чемезов, Татарстан Премьер-министры Илдар Халиков, Идел буе федераль субъектлары башлыклары һәм хәрби-сәнәгать оешмалары җитәкчеләре катнашты.

Киңәшмә сакчыл производство буенча ике көнлек конференциягә нәтиҗә ясады, ул хәрби-сәнәгать комплексы оешмаларында сакчыл производство системасын кертү һәм дәүләт оборона заказы өлкәсендә монополиягә каршы таләпләрне гамәлгә кертү мәсьәләләренә кагылды, дип хәбәр итә Чаллы шәһәре мэриясе матбугат хезмәте.

Дмитрий Рогозин киңәшмәне ачып, хәзерге вакытта Россиядә Европа культуралы производство булдыру мәсьәләсе бик кискен тора, дип билгеләде. Аның хәбәр итүенчә, 2020 елга оборона комплексы яңадан кораллану проблемасын хәл итәргә тиеш. Шуның белән бергә ул тагын бер мәсьәләгә, РФ Хөкүмәтенең төп бурычларының берсе – илне индустрияләштерүгә басым ясады. Дмитрий Рогозин фикеренчә, бу проблемалар Лин-технологияләрне исәпкә алып хәл ителергә тиеш.

Татарстанда республика җитәкчелеге ярдәме белән сакчыл производство алымын кертү буенча озын сроклы максатчан программа тормышка ашырылган. Лин-технологияләрне кертүдән килгән икътисади нәтиҗә узган ел республика буенча 6 млрд сум тәшкил иткән.

ТР Премьер-министры урынбасары – ТР сәүдә һәм сәнәгать министры Равил Зарипов хәбәр иткәнчә, Татарстанда Лин-технологияләрне кертү буенча эшкә социаль өлкәдәге һәм икътисадның төрле тармакларындагы предприятиеләр һәм оешмалар керешкән. Соңгы дүрт елда бу программма кысаларында 5 меңнән артык эшче укытылган.