Татарстан Премьер-министры “BONEXengineering” консалтинг компаниясенең проектлар буенча директоры белән очрашты

Бүген Республика Министрлар Кабинетында Татарстан Республикасы Премьер-министры Илдар Халиковның BONEXengineering консалтинг компаниясенең (Сербия) проектлар буенча директоры Р.Бошкович белән очрашуы булды, анда Татарстан Республикасы сәламәтлек саклау өлкәсенә сыйфат белән идарә итү системасын кертү мәсьәләләре каралды.

Очрашуда шулай ук ТР сәламәтлек саклау министры А.Ю.Вафин, “Югары медицина технологияләре мәгариф үзәге” фәнни-җитештерү берләшмәсе генераль директоры урынбасары Г.Р. Фәррахова, Чаллының Ашыгыч медицина ярдәме хастаханәсе баш табибы И.И.Хәйруллин катнашты.

Очрашу барышында Р.Бошкович “Сәламәтлек саклау өлкәсендә сыйфат белән идарә итү системасы” проектын гамәлгә ашыру инициативасы белән чыкты. Даими камилләшү шартларында медицина ярдәме күрсәтү, нәтиҗәлелекне һәм хезмәт җитештерүчәнлеген күтәрү процессында рискларны киметү, шулай ук пациентларның күрсәтелгән медицина ярдәменнән канәгать булуын арттыру-проектның максаты булып тора. Республиканың сәламәтлек саклау өлкәсенә сыйфат белән идарә итү системасын кертү этаплары турында фикер алышынды.

Проектны Татарстан сәламәтлек саклау министры А.Вафин җитәкли. Проектны гамәлгә ашыруда “Югары медицина технологияләре мәгариф үзәге”, Респбуликаның медицина оешмалары вәкилләре – җирле экспертлар, Татарстан сәламәтлек саклау министрлыгы вәкилләре, шулай ук BONEXengineering консалтинг компаниясе катнашыр, дип планлаштырыла.

Элегрәк BONEXengineering компаниясе медицина оешмалары җитәкчеләре өчен укыту циклын уздырган инде. Сәламәтлек саклау өлкәсендәге төрле проектлар буенча 1998 елда эшли башлыйлар. Компания Сербия, Черногория, Македония һәм Россия Федерациясендә уңышлы эшли.