Илдар Халиков Татарстанның өч районында язгы-кыр эшләренең барышы белән танышты

Бүген Татарстан Премьер-министры Илдар Халиков республиканың Питрәч, Теләче һәм Балык Бистәсе муниципаль районнарында язгы-кыр эшләренең барышы белән танышты. Хөкүмәт башлыгын ТР вице-премьеры – ТР авыл хуҗалыгы һәм азык-төлек министры Марат Әхмәтов озата йөрде.

Премьер-министр вертолетта хуҗалыкларның чәчү бара торган кырларын очып-карап узды, һәм авыл хуҗалыгы предприятиеләре җитәкчеләре белән киңәшмә уздырды.

Балык Бистәсе районының предприятие җитәкчеләре белән Илдар Халиков, Олы Елга һәм Саескан Тавы авыллары арасында урнашкан “Кама-Агро” агрофирмасы кырында очрашты.

Район буенча чәчүлекләрнең гомуми мәйданы 83,8 мең гектар тәшкил итә. Район башлыгы Илһам Вәлиев хәбәр иткәнчә, бүгенге көнгә язгы һәм бөртекле культураларның бары 30 %ы гына чәчелгән. Район мөгезле эре терлекнең баш саны белән 100% тәэмин ителгән, җирле гаилә фермалары актив үсә.

Балык Бистәсе районы республиканың башка районнары белән чагыштырганда, авыл хуҗалыгы буенча югары рейтингка ия түгел, дип борчылуны белдерде Марат Әхмәтов. Ул аграрийларны бөтен юнәлешләр буенча системалы эш алып барырга чакырды һәм якындагы берничә елда район иң яхшы нәтиҗәләр күрсәтәчәк, дип ышандырды.

Татарстан Премьер-министры үз чиратында, Балык Бистәсе районы күп кенә юнәлешләр буенча ярыйсы нәтиҗәләргә ия, әмма авыл хуҗалыгы буенча республикада иң артта калган районнарның берсе, дип билгеләп үтте. Илдар Халиков сүзләренә караганда, районда бу вәзгыятьне яхшырту өчен барлык шартлар да бар.

“Нигездә, дисциплина, шулай ук хуҗалык рәисе катнашы булган, җитәкче бу мәсьәләләр белән шәхсән шөгыльләнгәндә генә районнарның уңышка ирешүен күрәбез”, - диде ул. ТР Хөкүмәте җитәкчесе сүзләренә караганда, язгы кыр эшләрен оештырудан күп нәрсә тора, шуңа күрә һава шартлары яхшы торганда бөтен эшләрне вакытында һәм сыйфатлы башкару зарур. Ул Әтнә районын мисал итеп китерде, бүген алар иң яхшы нәтиҗәләргә ия.

Илдар Халиков журналистлар белән әңгәмәсендә, хәзер һава шартлары республиканың бөтен районында да эшләү мөмкинлеге бирә, диде. Бүген аграрийлар техника, ягулык-майлау материаллары һәм ашлама белән тәэмин ителгән. Якындагы ике көндә республика чәчү кампаниясе темплары буенча 50 процентка ирешчәгенә өметләнүен белдерде.

“Лидер районнар да, артта калучы районнар да бар. Бүген чәчү эшләре начар оештырылган районнар юк”, - диде И.Халиков. Республика җитәкчелеге, язгы кыр эшләре белән бәйле мәсьәләләрне һәм авыл кешеләрен борчыган проблемаларны урында хәл итү өчен, кырларны карауны һәм аграрийлар белән очрашуны дәвам итәчәк, дип белдерде ул.