Илдар Халиков баскетбол Евролига башлыгы белән очрашты

Бүген Татарстан Премьер-министры Илдар Халиков баскетбол буенча Евролига башкарма директоры Жорди Бертомеу белән очрашты.ТР Хөкүмәте Йортындагы очрашуда шулай ук ТР Милли банк рәисе – УНИКС баскетбол клубы президенты Евгений Богачев, ТР яшьләр эшләре һәм спорт буенча министр урынбасары Хәлил Шәйхетдинов катнашты.

Европаның төп клуб баскетбол турнирын җитәкләүче Жорди Бертомеу Казанга, Европа Кубогының финал матчын карарга килгән. Казанның УНИКС һәм Испаниянең “Валенсия” командалары катнашындагы уен бүген Казанның “Баскет-холл” бинасында була. 1 майда Испаниядә булган финал сериясенең беренче матчыннан соң, УНИКС көндәшләренә 13 очкога оттырды, турнирда җиңү өчен бүген Казан баскетболистлары отарга тиешләр.

Илдар Халиков бүген Жорди Бертомеуга ТР Президенты Рөстәм Миңнеханов исеменнән сәлам тапшырды һәм дәрәҗәле кунакны Казанның истәлекле урыннарын, шулай ук башкаланың спорт объектларын карарга чакырды.
“Сезгә бүгенге уен гына түгел, ә бәлки безнең шәһәребез дә ошар дип ышанабыз”,-диде Илдар Халиков.

Үз чиратында Жорди Бертомеу Илдар Халиковка һәм республика җитәкчелегенә җылы каршы алулары өчен рәхмәт белдерде.

Бүген Жорди Бертомеу Казан Кремлендә, Иске Татар бистәсе, һәм шулай ук Казанның зур спорт объектларында – Спортның су төрләре сарае, “Казан-Арена” стадионы, Гимнастика үзәге, Теннис академиясендә булачак, дип планлаштырыла.