Казанда ТР Хөкүмәте кубогына картинг буенча IX турнир уза

Бүген Казанда Татарстан Хөкүмәте кубогына картинг буенча ярышлар уза. Халыкара балаларны яклау көненә багышланган турнир республикада тугызынчы ел рәттән уздырыла.

Яшь спортчыларны котларга ТР Премьер-министры Илдар Халиков, ТР Президенты Аппараты җитәкчесе Әсгать Сәфәров, Татарстанның яшьләр эшләре һәм спорт буенча министры Рафис Борһанов килде.

Татарстан Президенты Рөстәм Миңнеханов исеменнән сәламләү сүзләрен Илдар Халиков җиткерде.
“Монда Татарстанның иң яхшы картингчылары җыелган. Үзегезнең әти-әниләрегез һәм остазларыгыз белән сез спортның гади булмаган, матур төре белән шөгыльләнәсез. Үзегезнең шәһәр һәм районнарыгызда сез иң яхшылар, җиңүчеләр икәнегезне исбатлый алгансыз. Сезгә үзегезнең өйрәнгәнегезне иң югары дәрәҗәдә күрсәтә алуыгызны телим”,- диде Илдар Халиков.

Оештыручыларның хәбәр итүенчә, бүген ярышлар ике класста - Honda GX 200 6,5 а.к. (8-12 яшь) һәм Honda GX 270 9 а.к. (12-16 яшь) уза. Трассага республиканың 16 шәһәр һәм районнарыннан 162 спортчы чыгачак.

Республикада картинг хәрәкәте юл хәрәкәте иминлеген тәэмин итү программаларының мөһим өлеше булып тора. Уртача бер елга унҗиде класста уннан артык республика ярышлары уза.