Рөстәм Миңнеханов Kazansummit 2014тә катнашучы дипломатик миссияләр башлыкларын Сабантуй милли бәйрәменә чакырды

Бүген Татарстан Республикасы Президенты Рөстәм Миңнеханов Kazansummit 2014 Россия һәм Ислам Хезмәттәшлеге оешмасы илләренең алтынчы халыкара икътисадый саммитында катнашучы дипломатик миссияләр башлыкларын Сабантуй милли бәйрәменә чакырды.

Очрашу Казанда Халыкара мәгълүмат үзәгендә узды.

Очрашуда Согуд Гарәбстанының, Суданның, Тунисның, Алжирның, Гыйракның, Катарның, Бәхрәйннең, Индонезиянең, Малайзиянең, Берләшкән Гарәп Әмирлегенең һәм башка илләрнең Россия Федерацияседәге Гадәттән тыш һәм Тулы вәкаләтле илчеләре катнашты.

Сезнең монда булуыгыз халыкара икътисадый саммитына югары статус бирә, диде Рөстәм Миңнеханов, бүген бу – Россия белән ислам дөньясын якынайтучы реаль мәйданчык.

Татарстан Президенты искә төшергәнчә, бу ислам дөньясы илләре илчеләре белән беренче генә очрашу түгел, үзара конкрет проектлар белән беркетелгән яхшы багланышлар урнаштырылган.

Мондый очрашулар үзара элемтәләргә һәрвакыт уңай тәэсир итә, диде Рөстәм Миңнеханов, региональ дәрәҗәдә аралашу Россиягә ислам илләре белән мөнәсәбәтләрне ныгытырга ярдәм итә.

Очрашуда катнашучылар саммитның динамик үсешен, имиджы елдан-ел ныгуны билгеләп үттеләр. Алар фикеренчә, Татарстанга визитлар – Россия регионнарының берсендәге мәдәният, тел һәм традицияләр белән танышу өчен уникаль мөмкинлек.

Россия Федерацияседәге Гадәттән тыш һәм Тулы вәкаләтле илчеләр киләчәктә дә икътисадый, мәдәни һәм мәгариф өлкәләрендә багланышларны ныгытырга кирәклеген белдерделәр.

Конкрет тәкъдимнәр белән Согуд Гарәбстаны, Тунис, Малайзия, Катар, Индонезия илчеләре чыгыш ясадылар.

Рөстәм Миңнеханов дипломатик миссияләр башлыкларын татарларның мәдәниятен һәм гореф-гадәтләрен төгәлрәк белү өчен якындагы шимбә көнендә Татарстан Республикасының Лаеш районында булачак Сабантуй милли бәйрәменә чакырды.