Быел Татарстанда БДИ уздырганда тәртип бозуларның саны сизелерлек кимегән

Быел Татарстанда, куркынычсызлык чараларын көчәйтү ярдәмендә, үткән ел белән чагыштырганда, БДИ уздырганда тәртип бозуларның санын киметеп булган. Бу хакта бүген ТР Хөкүмәте Йортындагы брифингта ТР мәгариф һәм фән министры урынбасары Андрей Поминов хәбәр итте.

“Мәгълүмат куркынычсызлыгы чараларын көчәйтү, имтихан тапшыру пунктларын видеокүзәтү системалары белән тәэмин итү, металодетекторлар куллану – болар барысы тәртип бозулар санын киметергә ярдәм итте”, - диде түрә.

Үткән елда төбәктә телефон кулланган өчен 33 кеше чыгарылган булса, быел - өчәү генә.

КИМнарны интернетта урнаштырган өчен, Тәтеш районыннан укучының эше гамәлдән чыгарылган. Үткән елда мондый очрак Баулы һәм Нурлат районнарыннан ике укучы белән булган.

Имтиханны уздыру кагыйдәләрен бозган БДИ катнашучыларына карата административ эшләр кузгату саны кимегән. “Үткән елда 65 эш кузгатылган, агымдагы елда – 11. Алар 5 укучыга (өчесе телефон кулланган – Т.И. иск.) һәм 6 административ затка карата кузгатылган. Материаллар судларда карауда. Исегезгә төшерим: БДИ уздыру тәртибен бозган өчен, штрафлар рәвешендә җаваплылыкка тарту каралган: катнашучылар өчен - 3-5 мең сум, вазыйфаи затларга – 20-40 мең сум”, - дип ассызыклады Поминов.