Россия авыл хуҗалыгы министры Николай Федоров Татарстанда “Миңлехуҗин М.Н.” КФХ гаилә терлекчелек фермасының эшчәнлеге белән танышты

Бүген көннең икенче яртысында Татарстан Республикасына Россия авыл хуҗалыгы министры Николай Федоров килде.

“Бигеш” халыкара аэропортында Николай Федоровны Татарстан Премьер-министры Илдар Халиков, ТР Премьер-министры урынбасары – ТР авыл хуҗалыгы һәм азык-төлек министры Марат Әхмәтов каршы алды.

Килеп җитү белән Николай Федоров ТР Премьер-министры озатуында Татарстанның Тукай Районы Бакчасарай торак пунктындагы “Миңлехуҗин М.Н.” КФХ гаилә терлекчелек фермасына юнәлде. Монда ул хуҗалык төзелешләрен карады, гаилә фермасының эшчәнлеге белән танышты.

Ферма 2012 елның февралендә оештырыла, Эшчәнлегенең төп төре – терлекчелек продукциясен җитештерү. Бу хуҗалыкта мөгезле эре терлек, сарык, ат үрчетү, кошчылык белән шөгыльләнәләр. Гаилә фермасы проекты бәясе- 23,7 млн сум, шул исәптән дәүләт ярдәме 14,1 млн сум тәшкил итә.
Хәзерге вакытта фермада 8 кеше эшли, уртача хезмәт хакы – 17, 1 мең сум.

2014 елның 1 июнь мәгълүматлары буенча мөгезле эре терлек – 134 баш, шул исәптән сыерлар-36, сарыклар- 468, атлар- 68 баш тәшкил итә. Савым сыерларын 100 башка кадәр арттыру планлаштырыла.

Николай Федоров сыерларның симез һәм гомумән терлекләрнең яхшы хәлдә булуын билгеләде.

Аннан соң Николай Федоров “Кама” агрофирмасында һәм “Камский бекон” ҖЧҖнең сугым цехларында булды.