Татарстан ягу сезонына 80 процентка әзер

Агымдагы елның 15 августына булган мәгълүматлардан күренгәнчә, Татарстанның муниципаль районнарында 16 мең 446 күп фатирлы торак йортның 11 мең 883е буенча, ягъни якынча 80 процентында 2014/2015 елгы ягу сезонына әзерлек паспорты рәсмиләштерелгән.
Барлыгы республикада 7 мең 382 социаль-мәдәният объектлары санала. Шуларның 2381 сәламәтлек саклау учреждениесенең 2047сендә, 1961 мәдәният объектының 1786сында, 3590 мәгариф оешмасының 3231ендә, 143 социаль яклау учреждениесенең 111ендә көзге-кышкы чорга әзерлек тәмамланган.
Бу хакта бүген ТР Министрлар Кабинетында видеоконференция режимында узган брифингта ТР төзелеш, архитектура һәм торак-коммуналь хуҗалык министры Ирек Фәйзуллин хәбәр итте.

“Инженер инфраструктурасына килгәндә, 1932 котельныйның 1661е, 3 мең 214 км озынлыктагы җылылык челтәрләренең 2 мең 764 километры әзер. 303 суүткәргеч насос станцияләренең 287се көтелгән эшләргә әзер”, - дип белдерде Ирек Фәйзуллин. Аның сүзләренә караганда, быел социаль билгеләнешле объект котельныйларында казаннарны алмаштыру программасы гамәлгә ашырыла.
Газификация фонды тарафыннан бюджет өлкәсендә казаннарны алмаштыру буенча эш 30 муниципаль берәмлектә 212 объектта башкарыла. “Бүгенге көндә 383 казанның 380е инде алмаштырылган һәм файдалануга тапшыруга әзерләнә”, - дип хәбәр итте Ирек Фәйзуллин.

Хәзерге вакытта Татарстанның 159 гомуми белем бирү мәктәбендә капиталь төзекләндерү эшләре дәвам иттерелә. Бүген аларда түбә өслеге, эчке инженер коммуникацияләре, фасад төзекләндерелә, тәрәзәләр, санузеллар, бүлмә ишекләре алмаштырыла.
Аның сүзләренә караганда, 95 мәктәптә эшләр төгәлләнү алдында. Министр барлык гомуми белем бирү учреждениеләрендә дә эшләр тәмамланып, 1 нче сентябрьгә әзер булачагына ышандырды.

Министр шулай ук быел республикада авыл җирлекләрендә урам яктырту баганаларын алмаштыру программасы тормышка ашырылуын билгеләп узды. Бу максатларга 225 млн сум акча бүлеп бирелгән (һәр муниципаль берәмлеккә 5әр млн сум).

Ирек Фәйзуллин шулай ук, күп фатирлы торак йортларны капиталь төзекләндерү программасына быел гомуми мәйданы 4,8 млн кв.м тәшкил иткән 793 йорт кертелгәнен әйтеп үтте. Шушы программаны 2015 нче елда гамәлгә ашыруга әзерлек алып барыла. Аңа 800 гә якын торак йортны кертү планлаштырыла.