Казан мэриясе Казансу елгасының яр буе зонасында Универсиада-2013 өчен кирәкле спорт объектларын төзүгә бәйле ачык тыңлаулар үткәрәчәк

Бүген Татарстан Республикасы Министрлар Кабинетында үткәрелгән брифингта Татарстан Республикасы Экология һәм табигый ресурслар министрлыгы вәкилләре журналистларның Казансу елгасының яр буе зонасында Казан инфраструктурасын үстерү һәм аңа бәйле экологик хәл турындагы сорауларына җавап бирделәр.
Брифинг, гадәттәгечә, республиканың барлык муниципаль районнарын тоташтырып, видеоконференцэлемтә режимында узды һәм Интернет челтәрендә трансляцияләнде.
“Гринпис”тан Татарстан Республикасы Президенты адресына җибәрелгән хат шәһәр җәмәгатьчелеге һәм табигатьне саклау оешмалары вәкилләрендә күп сораулар тууга сәбәп булды. Анда Казансу акваторие тирәсендә яңа объектлар төзүнең шәһәр эчендәге икътисади хәлгә зыян китерәчәге турында әйтелә.
Шуны да искәртик: Казансуның уң ярында Универсиада-2013 өчен түбәндәге объектларны төзергә карар иткәннәр: 41 мең урынга исәпләнгән футбол стадионы һәм спортның су төрләре сарае (йөзмә күпер тирәсендә).
Казан башкарма комитеты җитәкчесе урынбасары Эмиль Хөснетдинов хәбәр иткәнчә, төзелеш һәм төзекләндерүгә 78 га мәйдан бүлеп биреләчәк, шуның 8 процентында гына турыдан-туры төзелеш эшләре алып барылачак, ә калган 92 процентында (ягъни 72 га җирдә) төзекләндерү эшләре (елга юлын чистартып, яр буен төзекләндерү; ял итү зоналарын булдыру; 35 мең агач утырту) алып барылачак.
Татарстан Республикасы Фәннәр академиясендәге Экология проблемалары институтының гидрология лабораториясе мөдире Асия Горшкова шулай ук массакүләм мәгълүмат чаралары вәкилләренә Универсиада объектларын төзү һәм елганың яр буе зонасын төзекләндерү аркасында Казансу елгасы суының сыйфаты һәм экологик хәл начараю куркынычы булмавын әйтте. Аның фикеренчә, бу, киресенчә, Казансу төбен чистарту, елганың су агышын яхшырту мөмкинлеге бирәчәк. Төзелеш Куйбышев сусаклагычына да бернинди зыян китермәячәк.
Эмиль Хөснетдинов журналистларга якын арада (бу җәйдә) Казансу елгасы тирәсендәге инфраструктураның үзгәрүенә багышланган ачык тыңлаулар үткәрү һәм, экспертлар буларак, табигатьне саклау оешмаларын, экология белгечләрен җәлеп итү күздә тотылуын әйтте.