Татарстан Республикасында күп фатирлы йортларга капиталь ремонт программасы буенча эшләр 646 объектта тәмамланган

Татарстан Республикасында күп фатирлы йортларга капиталь ремонт программасы буенча башкарылган эшләрнең күләме 4 млрд 565 млн сум тәшкил иткән. Бу хакта бүген ТР Хөкүмәте йортында узган киңәшмәдә ТР төзелеш, архитектура һәм ТКХ министры Ирек Фәйзуллин хәбәр итте.

Киңәшмәне республиканың барлык муниципаль районнары белән видеоконференцэлемтә режимында ТР Премьер-министры Илдар Халиков уздырды.

Ирек Фәйзуллин хәбәр иткәнчә, авылларда су белән тәэмин итү программасы буенча эшләр тәмамланган. Газлаштыру фонды 45 муниципаль берәмлектә 28 скважина бораулады, 328,5 км суүткәргеч челтәрләр төзелде.

Шулай ук социаль-мәдәният өлкәсендә пар казаннарын алыштыру буенча программа төгәлләнде. Программа буенча 29 муниципаль районда 209 объектта 379 пар казаны алыштырылган.

Ирек Фәйзуллин 2014 елда яктыртуны яңарту программасы буенча эшләрнең төгәлләнүе турында хәбәр итте. Эшләр барлык 45 районда тәмамланган.

Ул шулай ук энергияне саклау программасы буенча программаның барышы турында сөйләде. Бүгенге көнгә Әлмәт,Алабуга, Яшел Үзән, Түбән Кама районнарында һәм Чаллы һәм Казан шәһәрләрендә эшләр төгәлләнгән.

Ирек Фәйзуллин 11 көллияттә капиталь ремонт турында хәбәр итте. Аның сүзләренчә, эшләр график буенча алып барыла.
Министр мәгълүматлары буенча, 2014-2015 елларның ягу чорына әзерлек кысаларында, республикада 6 муниципаль берәмлектә – Актаныш, Әлки, Апас, Лаеш, Яңа Чишмә һәм Питрәч районнарында җылылык тулысынча җибәрелгән.

Илдар Халиков ял көннәрендә республиканың калган муниципаль берәмлекләрендәге социаль билгеләнештәге объектлар буенча җылылык бирү эшләрен төгәлләргә кирәклеген белдерде.