Илдар Халиков “Урман утырту көне” акциясендә катнашты

Бүген Татарстан Республикасында “Урман утырту көне” табигатьне саклау акциясе уза. Акция 2011 елдан ТР Урман хуҗалыгы министрлыгы инициативасы буенча һәм ТР Министрлар Кабинеты карары нигезендә уздырыла. Акциядә ТР Премьер-министры Илдар Халиков катнашты. Ул урман хуҗалыгы буенча белгечләр белән бергәләп чыршы утыртты.

Акциянең максаты – республиканың урман ресурсларын яңадан үстерү генә тәгел, бәлки гражданнарда урманга карата сакчыл караш тәрбияләү, җәмгыятьнең игътибарын утыртылган агачларны саклау проблемаларына юнәлтү дә.

Акцияне уздыру урыннарының берсе буларак бүген Kazan-Arena стадионы артындагы территория сайланды. Монда ТР Министрлар Кабинеты Аппараты хезмәткәрләре һәм үзләренең җитәкчесе Әсгать Сәфәров белән ТР Президенты Аппараты хезмәткәрләре җыелды.

“Шәһәр яны урманчылыгы” идарәсе җитәкчесе Илнур Кәшәфиев сөйләгәнчә, акция традициягә керде, ул бөтен республика буенча уздырыла.

Быелгы көздә якынча 3 млн. агач утырту планлаштырыла, дип белдерде ТР урман хуҗалыгы министрының беренче урынбасары Харис Мусин.

Экология оешмаларының һәм гражданнарның теләкләрен, шулай ук һава торышының уңай шартларын исәпкә алып, ТР Урман хуҗалыгы министрлыгы акцияне 20 октябрьгә кадәр озайта.