ТРның беренче вице-премьеры Алексей Песошин: “Татарстанныкын сатып ал!” акциясе кысаларында импортны алыштыручы продукцияне алга җибәрергә кирәк

ТР Премьер-министрының беренче урынбасары Алексей Песошин Татарстан Республикасында авыл хуҗалыгы продукциясе, чимал һәм азык-төлек базарларының торышын контрольдә тотучы оператив штабның чираттагы утырышын уздырды. Бу чара ТР Хөкүмәте йортында узды.

Оператив штаб әгъзалары үзебез илдә, шул исәптән Татарстанда җитештерелгән товарларга ихтыяҗны стимуллаштыру буенча тәкъдимнәрне карадылар.

Республикада “Татарстанныкын сатып ал!” акциясе дәвам итә, дип искә төшерде Алексей Песошин. Бу акция Татарстан Республикасы Президенты Рөстәм Миңнеханов инициативасы белән башланып киткән иде.

ТР сәнәгать һәм сәүдә министры урынбасары Рашат Фәттахов доклад ясады. Ул кыскача үзебез илдә, шул исәптән республикада җитештерелгән товарларны базарда алга җибәрү өчен ММЧда уздырылган һәм уздырырга планлаштырылган чаралар турында кыскача сөйләде. Бу, аерым алганда, телеканалларда сюжетлар, викториналар, презентацияләр уздыру.

Рашат Фәттахов хәбәр иткәнчә, акциянең кысалары киңәйтелә – болар азык-төлек һәм сәнәгать товарлары гына түгел, бәлки хезмәт күрсәтү өлкәсе дә.
Моннан тыш, Татарстан территориясендә үз эшчәнлеген алып баручы ваклап сату сәүдә челтәрләре белән дә эш алып барыла.

Алексей Песошин утырышта катнашучыларның игътибарын “Үзебез илнекен сатып ал! Татарстанныкын сатып ал!” акциясе кысаларында импортны алыштыручы продукцияне алга җибәрү кирәклегенә юнәлтте.