Татарстанда быел 4,4 млрд сумнан артык милек салымнарын җыю планлаштырыла

Татарстанда быел салым органнары физик затлардан 4,4 млрд сумнан артык милек салымнарын җыюны планлаштыра. Бу хакта бүген ТР Министрлар Кабинетында узган брифингта Россия федераль салым хезмәтенең ТР буенча идарәсе җитәкчесе Марат Сафиуллин хәбәр итте.

Ул сөйләгәнчә, хәзерге көнгә милек салымнарының 50%ы җыелган инде.

Докладчы, милеккә һәм транспорт өчен салым түләү срогы 5 ноябрьдә, ә җир өчен салым түләү срогы 17 ноябрьдә чыга, дип искә төшерде.
“Әгәр ниндидер сәбәпләр аркасында гражданнар салым түләү турындагы белдерү кәгазен алмаган булсалар, аларга шушы араларда салым органнарына мөрәҗәгать итәргә кирәк”, - дип ассызыклады Марат Сафиуллин.

Аның сүзләренчә, 25 октябрьдә иртәнге 9 дан кичке 6 га кадәр барлык салым органнарында физик затлар өчен ачык ишекләр көне уздырылачак. Килүчеләр үзләренең түләүләрен ачыклау буенча сораулар бирергә, Россия федераль салым хезмәте сайтында электрон хезмәт күрсәтү белән танышырга мөмкин.
“Һеркем тулы мәгълүмат алачак”, - диде Марат Сафиуллин.