Татарстан Премьер-министры Илдар Халиков “Россия төбәкләрендә һәм шәһәрләрендә стратегик планлаштыру” форумы эшендә катнаша

Татарстан Республикасы Премьер-министры Илдар Халиков Санкт-Петербургта “Россия төбәкләрендә һәм шәһәрләрендә стратегик планлаштыру” XII Бөтенроссия форумында катнаша.

Форум 2002 елдан һәр ел саен уздырыла һәм стратегик планлаштыру алымнары һәм механизмнары, Россия төбәкләрен һәм шәһәрләрен үстерүнең комплекслы проектларын һәм стратегик планлаштыруны гамәлгә ашыру мәсьәләләре буенча фикер алышу өчен төп мәйданчык булып санала.

Форумны РФ Дәүләт Думасы, РФ Региональ үсеш министрлыгы, РФ Финанслар министрлыгы, РФ Икътисади үсеш министрлыгы, Санкт-Петербург Хөкүмәте, “Стратегик тикшеренүләр үзәге” фонды, “Леонтьев үзәге” Халыкара социаль-икътисадый тикшеренүләр үзәге оештыра.

Бу чараның төп максаты – шәһәрләр һәм төбәкләр арасында тәҗрибә алмашу, стратегик планлаштыру лидерлары белән стратегик планнарны эшләүне һәм гамәлгә куюны тоткарлаучы факторлар хакында фикер алышу.

2014 елгы форумның төп темасы: “Стратегияләрне яңарту һәм максатларны яңарту”. Бу теманы сайлау, беренчедән, глобаль икътисади тотрыксызлык, яңа глобаль кризисның күп төрле билгеләре ачыклану белән, икенчедән, Россия икътисадының үсә барган структура кризисы белән бәйле.

Быел форум мәйданчыгында Татарстан катнашында ике чара уза: республика вәкилләре “Планнар һәм чынбарлык”темасы буенча узган пленар утырышта катнаша (28 октябрь), бүген шулай ук "Стратегия-2030" проекты һәм Леонтьев үзәге белән хезмәттәшлек кысаларында “Татарстанның үсеш стратегияләре өстенлекләре” темасы буенча түгәрәк өстәл уза.