Илдар Халиков гражданнар оборонасы буенча бөтенроссия киңәшмәсендә катнашты

Бүген Сочида федераль башкарма хакимият органнары һәм Россия Федерациясе субъектлары башкарма хакимият органнары җитәкчеләре катнашында гражданнар оборонасы проблемаларына багышланган бөтенроссия киңәшмәсе узды. Киңәшмә эшендә Татарстан Премьер-министры Илдар Халиков катнашты.

Киңәшмә эшендә барлыгы федераль һәм төбәк дәрәҗәсендәге башкарма хакимият органнарының 300дән артык вәкиле, 11 федераль агентлык һәм ведомство башлыгы, шулай ук Россия Гадәттән тыш хәлләр министрлыгының территориаль органнары һәм оешмалары үзәк аппараты җитәкчеләре катнашты.

Бүген пленар утырыш һәм гражданнар оборонасын үстерү һәм камилләштерү буенча семинар барышында анда катнашучылар ил территориясендә гражданнар оборонасын оештыру һәм идарә итү проблемалары турында фикер алыштылар, гражданнар оборонасын камилләштерү һәм үстерү һәм заман таләпләрен исәпкә алып, халыкны яклау мәсьәләләрен карадылар. Гадәттән тыш хәлләр министрының беренче урынбасары Сергей Шляков, министр урынбасары Владимир Степанов, башкарма хакимият органнары һәм оешмалары җитәкчеләре чыгыш ясадылар.

Шулай ук киңәшмә кысаларында «Имеретинский» йөк портында зур күләмле тактик-махсус өйрәнүләр узды, аның төп бурычы заманча коткару технологияләрен күрсәтү һәм бүлекчәләрне гамәлдә куллану тактикасы булды.

Бер үк вакытта Гадәттән тыш хәлләр министрлыгы белгечләре Красная Поляна бистәсе янында таулы җирдә коткару эшләрен уздырдылар һәм берничә объект - "Адлер" тимер юл станциясе, М-27 федераль автоюлының 6 нчы тоннелендә һәм Адлер ТЭЦында янгын сүндерделәр.