Казанның яңартылган зооботаника бакчасында сафари-парк һәм ясалма тау булачак

Киләсе ел Татарстанда парклар һәм скверлар елы итеп игълан ителде. Шул уңайдан, башкаланың зооботаника бакчасы да зур үзгәрешләр кичерәчәк. ТР Президенты Рөстәм Миңнеханов Указы нигезендә, “Татинвестгражданпроект” институты объектны төзекләндерү буенча проект эскизы төзегән. Әлеге оешманың директоры Гадел Хөснетдинов бүген ТР Хөкүмәтендә узган брифингта хәбәр иткәнчә, “түгәрәк өстәл”ләр оештырып, проектны өйрәнәчәкләр, тикшерәчәкләр һәм бер ай эчендә ул расланырга тиеш. Зооботаника бакчасын төзекләндерү эшләре исә киләсе ел башына планлаштырыла.

Яңартылган зооботаника бакчасында фәнни-тикшеренү үзәге, оранжерея, хайваннарны тотып карарга мөмкинлек бирә торган зона, аттракционлы балалар зонасы, ресторан, кафе һ.б. күрергә мөмкин була.

Төзекләндерү эшләре ике этапта үтәчәк. Беренче этабында яңа павильоннар булдыру, икенчесендә исә хәзерге зоопарк территориясен төзекләндерү планлаштырыла. Тәзекләндерү эшләре барышында хәзерге зоопарк үзенең эшен туктатмаячак.

Гадел Хөснетдинов сүзләренчә, яңа территориядә нигез итеп “могҗизалы тау” алына. Әлеге тауда төрле җәнлекләр урнаштырылачак, шулай ук, ясалма сулык булдыру да ниятләнә. Яңа мәйданнар Кабан күле буенда төзелер дип көтелә.

Төзекләндерү эшләренә акча республика бюджетыннан бүленә. Шулай ук, иганәчеләрне, инвесторларны җәлеп итү күздә тотыла.

Киләсе елда Казан зооботаника бакчасы мәйданын 7,7 гектардан 17,5 гектарга кадәр зурайту, хайваннар санын 4 меңнән 6-6,5 меңгә кадәр арттыру ниятләнә. Шулай ук, зоопарк территориясендә аерым “Сафари-парк” булдыру да күздә тотыла. Анда жирафлар, мөгезборыннар, арысланнар, юлбарыслар, пандалар, филләр урын алачак.

2016 елда Казан зооботаника бакчасы үзенең 210 еллыгын билгеләп үтәчәк. 2013 нче елда анда 225 мең кеше булган. Быелның 1 ноябренә исә Казан уртасындагы әлеге тереклек почмагына 222 мең кеше килгән. Яңартылганнан соң, монда кимендә 1 миллион кеше килер дип көтелә.