15 ноябрьдән республикада су объектларында куркынычсызлык айлыгы башланды

Бүгенге көнгә Татарстанда су объектларында 133 кеше үлгән, бу узган елга караганда 45 кешегә кимрәк. Барлыгы 56 кеше коткарыла. Әмма, шуңа карамастан, соңгы вакытта кешеләрнең ныгып җитмәгән боз астына китү очраклары ешайды. Бу хакта бүген ТР Министрлар Кабинетында узган брифингта Татарстан Республикасының кече үлчәмле суднолар буенча дәүләт баш инспекторы Илһам Насыйбуллин хәбәр итте.

Мондый бәхетсезлек очраклары Казанда, Яшел Үзән, Әгерҗе һәм Актаныш районнарында теркәлгән. Илһам Насыйбуллин сүзләренчә, бәхетсезлек очраклары артуның төп сәбәбе балыкчыларның куркынычсызлык чараларын бозулары, шулай ук республика террриториясендә алмашынучан һава температурасы булу.

“Күпьеллык статистикадан күренгәнчә, кешеләрнең боз кату чорында үлү мәсьәләсе бик кискен тора һәм аерым игътибар сорый”, -дип белдерде Илһам Насыйбуллин.

Көзге-кышкы чорда су объектларында кешеләрнең иминлеген тәэмин итү өчен берничә хөкүмәт документы кабул ителгән иде, шуларның берсе ТР Министрлар Кабинетының 22 октябрьдәге күрсәтмәсе - “Татарстан халкын 2014/2015 елларның кышкы чорында су объектларында иминлеген тәэмин итү буенча өстәмә чаралар турында”.

Бу документ нигезендә, 15 ноябрьдән республикада су объектларында куркынычсызлык айлыгы уздырыла.