Төркмәнстанның Мары шәһәре Казаннан төрки дөньяның мәдәни башкаласы эстафетасын кабул итеп ала

Бүген Казан Ратушасында ТӨРКСОЙ Халыкара төрки мәдәният оешмасы Даими шурасының XXXII утырышы бара. Утырышның ачылышында Татарстан Республикасы Премьер-министры Илдар Халиков, ТӨРКСОЙ Генераль секретаре Дүсен Касеинов катнашты.

Утырышта шулай ук ТӨРКСОЙга керүче ил вәкилләре – Казакъстан Республикасы мәдәният министры Арыстанбәк Мухамедиулы, Кыргызстанның мәдәният, мәгълүмат һәм туризм министры Алтынбәк Максутов, Төркмәнстанның мәдәният министры Аннагелди Гараджаев, Әзәрбайҗан Республикасы мәдәният һәм туризм министрының беренче урынбасары Вагиф Алиев, Гагаузиянең Мәдәният һәм туризм Баш идарәсе башлыгы Василий Иванчук, Хакасия Республикасы мәдәният министры Светлана Окольникова, Алтай Республикасының мәдәният министры урынбасары Артур Марлужоков, Башкортстан Республикасы мәдәният министры Әминә Шәфыйкова һәм башкалар катнаша.

Илдар Халиков утырышта катнашучыларны ТР Президенты, Дәүләт Советы, Хөкүмәте исеменнән сәламләде. “Без төрки мәдәниятнең дөньякүләм цивилизация үсешендәге әһәмиятен югары бәялибез. Соңгы вакытта ТӨРКСОЙ яңа халыкара мәдәни багланышларны ныгытуда җитди адымнар ясады”, - дип, Премьер-министр төрки телле халыклар арасында бердәмлекне ныгытуга оешманың саллы өлеш кертүен ассызыклады.

Хөкүмәт башлыгы искәртеп узганча, ТӨРКСОЙга керүче әгъза-илләрнең Даими шурасы утырышында Татарстан башкаласы Казан 2014 нче елда төрки дөньяның мәдәни башкаласы буларак игълан ителгән иде. “Билгеле, бу Татарстанга, аның казанышларына халыкара дәрәҗәдә югары бәяләмә, һәм бу мәдәни киңлектә халыкара мәдәни элемтәләрне үстерүгә җитди мөмкинлек булды”, - дип белдерде Илдар Халиков.

Премьер-министр Россия мәдәният министры Владимир Мединский исеменнән килгән Хөкүмәт телеграммасын укып үтте. “Казан – төрки дөньяның мәдәни башкаласы” программасы ахырына якынлашып килә. Ел дәвамында Россия Федерациясенең алдынгы субъектларының берсе булган Татарстан башкаласы мәдәният һәм сәнгать эшлеклеләренең мәдәни багланышлары өчен мәйдан булды. Иҗади интеллигенция очрашулары үтте, төрки музыка турында дискуссияләр, сәнгать өлкәсендә идеяләр уртаклашынды, фестиваль, конкурс һәм фәнни конференцияләр уздырылды. Казан төрки дөньяның мәдәни башкаласы миссиясен югары дәрәҗәдә үтәде, Россиянең бай потенциалын күрсәтә алды...” – диелә анда. Телеграммада 12 нче ноябрьдә Мәскәүдә РФ Мәдәният министрлыгы һәм ТӨРКСОЙ арасында үзара хезмәттәшлек турында меморандум имзаланганы искәртелеп, РФ Мәдәният министрлыгы һәм ТӨРКСОЙның партнерлыгы Россиянең төрки халыклары мәдәниятен саклап калу һәм аны үстерүгә кагылышлы булачагы билгеләп үтелгән.

Дүсен Касеинов ТӨРКСОЙның агымдагы елда үткәрелгән эшчәнлеге турында сөйләде. Ул билгеләп узганча, “Казан – 2014 нче елда төрки дөньяның мәдәни башкаласы” программасы бик югары дәрәҗәдә оештырылган. Ул моның өчен республика җитәкчелегенә тирән рәхмәтен җиткерде. “Казан абруйлы мәйданчык булды. Аның тәҗрибәсе киләчәктә төрки дөнья башкалалары тарафыннан өйрәнелеп, алар өчен үрнәк була алыр иде”, - дип ассызыклады ул.
Дүсен Касеинов хәбәр иткәнчә, киләсе елда Нәүрүз бәйрәменә багышланган халыкара фестиваль оештыру планлаштырыла. Фестиваль 2015 нче елда 70 еллыгын билгеләп үтәчәк ЮНЕСКО штаб-фатирында узачак.

Утырышта катнашкан ТӨРКСОЙ оешмасы әгъза-илләре Мәдәният министрлыклары вәкилләре һәркайсы сәламләү сүзләре белән чыгыш ясады. Утырышта шулай ук 2015 нче елда төрки дөньяның мәдәни башкаласы Төркмәнстанның Мары шәһәре булачагы билгеле булды.