Казанда Россиянең иң яхшы студентларын бүләкләделәр

Бүген Идел буе спорт һәм туризм академиясенең уку-лаборатория корпусында “2014 ел студенты” Россия милли премиясе җиңүчеләрен бүләкләү тантанасы узды. Бу чарада ТР Премьер-министры Илдар Халиков, Россия Мәгариф һәм фән министрлыгының балалар һәм яшьләрне тәрбияләү өлкәсендә Дәүләт сәясәте департаменты директоры Александр Страдзе, Россия яшьләр берлеге рәисе Павел Красноруцкий, ТР яшьләр эшләре һәм спорт министры урынбасары Рөстәм Гарифуллин, Россия Студентлар һәм студентлар берләшмәләре ассоциациясе рәисе Вячеслав Адерихин, ТР Студентлар лигасы президенты Элькин Искәндәров катнашты.

“Ел студенты” Россия милли премиясе быел беренче тапкыр уздырыла.

“Ел ачышы” номинациясендә КФУ студенты Илһам Галиуллин җиңү яулады. Ирекле студент итеп Ставрополь краеннан Виктория Ткачук танылды. Брянск өлкәсеннән Елена Капанжи елның чит ил студенты булды.

Алтай Республикасыннан Виктория Цишецкаяны жюри ел җәмәгатьчесе итеп сайлады. Воронеж дәүләт университетыннан Елена Тюрина ел журналисты булды.

“Ел спортчысы” номинациясендә җиңүчеләр икәү иде: Антон Корнилов (ИЭУП) һәм Еккатерина Анфиногенова (Санкт-Петербург дәүләт технологияләр һәм дизайн университеты).

Моннан тыш, “Ел интеллекты” исемен Дарья Морозова алды (Иваново дәүләт энергетика университеты), ә елның иҗади шәхесе буларак Константин Бутусов танылды (КНИТУ-КХТИ). “Елның студентлар лидеры” номинациясендә Лилия Диярова җиңде (КНИТУ-КХТИ).

Җиңүченең исеме аталыр алдыннан, тантанада катнашучыларны Александр Страдзе һәм Илдар Халиков сәламләделәр.
Александр Страдзе Россия мәгариф һәм фән министры Дмитрий Ливановның Россия студентлар берлеген булдыру турында приказны имзалавын хәбәр итте.

Илдар Халиков Казанда Россиянең иң яхшы студентлары җыелды, дип билгеләде. “Оештыручыларның шундый форумны уздыру мәйданчыгы итеп Казанны сайлаулары безнең өчен зур горурлык, без монда көч һәм талантларның туплануын күзәтәбез”,- диде ул.

Шуннан соң ТР Хөкүмәте башлыгы конкурсның Гран-при иясе исемен атады. “2014 ел студенты” исеменнән тыш, Ставрополь дәүләт аграр университеты студенты Екатерина Войтышева, 200 мең сумга сертификат алды.