Казанда "ТРның иң яхшы товарлары һәм хезмәтләре" республика конкурсында җиңүчеләр бүләкләнде

Бүген Казан ратушасында "ТРның иң яхшы товарлары һәм хезмәтләре" республика конкурсында җиңүчеләргә һәм "Россиянең иң яхшы товарлары" Бөтенроссия конкурсы лауреатлары һәм дипломантларына бүләкләр тапшыру тантанасы булды.

Ел саен уздырыла торган XI республика конкурсында икътисадның төрле тармагына караган 229 предпрятие һәм оешма катнашкан, алар 440 төр продукция һәм хезмәт тәкъдим иткән. 146 төр товар һәм хезмәт "ТРның иң яхшы товарлары һәм хезмәтләре" конкурсында җиңгән, аларның 59ы лауреат исеменә лаек булган. 83е "Россиянең иң яхшы товарлары" программасы дипломанты дип табылган.

"Әлеге конкурсларда катнашу Татарстан җитештерүчеләре өчен зур әһәмияткә ия. Бөтен дөньяда сыйфат күптәннән продукциянең көндәшлеккә сәләтлелегенә ирешү өчен төп күрсәткечкә әверелде. Өстәвенә, бу продукт һәм хезмәтләргә генә түгел, бизнес-процесслар, предприятие белән идарә итү системасы сыйфатына да кагыла. Әлеге елларда "ТРның иң яхшы товарлар һәм хезмәтләр" конкурсы республика, Россия һәм халыкара базарларга төрледән-төрле югары сыйфатлы продукция һәм хезмәтләрне алга этәрүдә ярдәмчегә әверелде", - диде бу уңайдан ТР Премьер-министры Илдар Халиков сәламләү чыгышында.

Аның сүзләренчә, ел саен конкуста катншучылар саны арта, бу исә җитештерүчеләрнең көндәшлеккә сәләтле товар чыгару мөмкинлеген күрсәтә. "Предприятиеләрнең 70 проценты ел саен үз продукциләренең югары сыйфатын, куркынычсызлыгын һәм аларга ихтыяҗ булуны раслый. Катнашучыларның 30 проценты - яңа предприятиеләр. Ел саен конкурска тәкъдим ителгән продукция һәм хезмәтләр исемлегенең 90 проценттан артыгы яңара. Быел аларның өлеше катнашучыларның гомуми санының 40 процентка якынын тәшкил иткән", - дип ассызыклады ТР Хөкүмәте башлыгы.

Илдар Халиков "Татарстан Республикасы сыйфат лидеры" призының 2014 елгы лауреатларына бүләкләр тапшырды. "Җитештерү-техник продукция" номинациясендә «ТАИФ-НК» ААҖ һәм «Техстрой» ЯАҖе бүләкләнде. "Халык өчен сәнәгать товарлары" номинациясендә "Мюстела" ҖЧҖ бүләкләнде. "Азык-төлек товарлары" номинациясендә "Яшел Үзән сөт эшкәртү комбинаты", "Хезмәтләр" номинациясендә Төбәкара
клиник-диагностика үзәге һәм "Бәкер" шифаханәсе, "Халык эшләнмәләре һәм гамәли сәнгать" номинациясендә "Сәхтиян" ҖЧҖ бүләкләнде.

"Сыйфат проблемалары академиясе" төбәкара иҗтимагый оешма башкаручы директоры, "Россиянең иң яхшы 100 товары" (Мәскәү) программасы җитәкчесе Евгений Сидоров сүзләренчә, быел Бөтенроссия конкурсы РФның 70 субъектында узган. "Россиядә сыйфатлы продукция җитештерүләре сөендерә, күп кенә төбәкләрдә ул көнбатыш тиңдәшләре белән көндәшлек итә ала. Татарстан продукциясе һәрчак сыйфатлы, төбәк әйдәп баручы позицияләрне били", - дип ышандырды ул.

Е.Сидоров ТР Премьер-министры Илдар Халиковка "Сыйфат отличнигы" мактау билгесен тапшырды. Ул шулай ук "Казанның 3нче икмәк заводы" ААҖнә "Россиянең иң яхшы товарлары" программасының иң төп - "Тәм сыйфаты" бүләген бирде.

ТР Премьер-министры урынбасары - сәнәгать һәм сәүдә министры, "Татарстан Республикасының иң яхшы товарлары һәм хезмәтләре" конкурсының оештыру комитеты рәисе Равил Зарипов сыйфатлы товарлар җитештерү һәм хезмәтләр күрсәтү халык иминлеген тәэмин итүдә иң мөһиме санала, дип ассызыклады. "Бүгенге катлаулы шартларда республиканың, һәр предприятие һәм учреждениенең көндәшлеккә сәләтлелеген арттыру зарур", - дип йомгаклады ул сүзен.