Казан Кремлендә табигый монополияләрнең иҗтимагый контроль механизмнары турында фикер алыштылар

Кичә, 16 декабрьдә, Казан Кремлендә Татарстан Республикасы Президенты каршында табигый монополияләр субъектларының эшчәнлеге мәсьәләләре буенча Тармакара кулланучылар советының икенче утырышы узды. Совет әгъзалары Татарстан Республикасы Президенты Аппараты җитәкчесе Әсгать Сәфәров катнашында табигый монополияләр эшчәнлегенә иҗтимагый контроль механизмнарын гамәлгә кертү мәсьәләләрен карадылар.

Беренче мәсьәлә буларак утырышта 2015-2019 елларга “Генерирующая компания” ААҖнең Инвестиция программасы проектын карау нәтиҗәләре буенча Тармакара кулланучылар советы нәтиҗәсе хакында фикер алыштылар. “Генерирующая компания” ААҖ генераль директоры Раузил Хаҗиев үзенең чыгышында предприятиенең 2019 елга кадәрге эш планнары турында сөйләде, предприятиенең нәтиҗәлелеген күтәрүгә мөмкинлек бирүче яңа төзелеш һәм инвестиция проектларына аеруча игътибар итте.

ТР Дәүләт советының икътисад, инвестицияләр һәм эшмәкәрлек буенча комитеты рәисе Рафис Борһанов утырышта төзелешне финанслау чыганакларын үзгәртү кирәклеге килеп туган очракта инвестиция программасына төзәтмәләр кертү механизмнарын билгеләүне тәкъдим итте. Шулай ук фикер алышу барышында,финанс базарындагы тотрыксызлыкны исәпкә алып, киләсе ел башында Генерирующая компаниянең инвестиция программасында проектларны өстәмә карау тәкъдим ителде.

Фикер алышуга Әсгать Сәфәров нәтиҗә ясады, ул билгеләгәнчә, 2015-2019 елларга “Генерирующая компания” ААҖнең инвестиция программаларын формалаштырганда кулланучыларның фикерләре исәпкә алынган. Тәкъдим ителгән фикерләрне исәпкә алып, Тармакара кулланучылар советы нәтиҗәне раслады, ул ТР Президенты Рөстәм Миңнехановка җибәреләчәк.

Икенче мәсьәлә буларак совет әгъзалары 2013-2015 елларга Татарстан Республикасының бәяләр (тариф) сәясәте республика концепциясенең гамәлгә керү барышын карадылар. Бу мәсьәлә буенча тарифлар буенча ТР Дәүләт комитеты рәисе Александр Штром доклад ясады. Аерым алганда, ул концепцияне тормышка ашыру өчен кабул ителгән чараларның үтәлеш нәтиҗәләре турында сөйләде. Концепциянең төп бурычлары үтәлгәнне исәпкә алып, совет әгъзалары тарифлар буенча ТР Дәүләт комитетына бу Концепцияне камилләштерү турында Татарстан Республикасы Хөкүмәтенә тәкъдим белән мөрәҗәгать итү кирәклеге турында карар кабул итте.

Өченче мәсьәлә буларак ТР Президентының 2014 елның 14 февраленнән булган “Татарстан Республикасы Президенты каршында табигый монополияләр субъектлары эшчәнлеге мәсьәләләре буенча Тармакара кулланучылар советы турында” УП – 234 номерлы указының үтәлеше каралды. Тармакара кулланучылар советы рәисе Алексей Пахомов үзенең чыгышында 2014 елда советның эшчәнлек нәтиҗәләре турында сөйләде.