Казанда ТР Хөкүмәтенең “Сыйфат өчен” премиясен тапшырдылар

Бүген Казанда Татарстан Республикасы Хөкүмәтенең “Сыйфат өчен” премияләренә 10 нчы республика конкурсы лауреатлары һәм дипломантларын бүләкләү тантанасы узды. Бүләкләрне Татарстанның беренче вице-премьеры Алексей Песошин тапшырды.

ТР Хөкүмәтенең сыйфат өчен премияләренә дәгъва кылу республика конкурсы 2003 елның апрелендә оештырылган. Премияләр ел саен конкурс нигезендә предприятие һәм оешмаларга продукция һәм хезмәтләр сыйфаты өлкәсендә ирешкән нәтиҗәләре, сыйфат белән идарә итүнең югары нәтиҗәле ысулларын гамәлгә кертүләре өчен тапшырыла.

Бүгенге тантананы ачып, Алексей Песошин, соңгы елларда республикада предприятиеләрнең сыйфат белән идарә итү өлкәсендә әйдәп баручы дөньякүләм җитештерүчеләре белән берләшүе күзәтелә, дип билгеләде. Аның сүзләренчә, конкурс бик популяр һәм әһәмиятлегә әйләнде. “Конкурста җиңү генә түгел, катнашу да бик мөһим санала, шуңа ул республика кысаларыннан чыкты. Конкурс лауреатлары хаклы рәвештә барлык товар җитештерүчеләр өчен үрнәк булып тора”, -дип белдерде Алексей Песошин.

Аның сүзләренчә, конкурс лауреаты исеме бүген – ТР Хөкүмәте тарафыннан югары бәя генә түгел, бәлки Россия күләмендә танылган бренд булып тора. Шуның белән бергә Татарстан – “Сыйфат өчен” премияләрен тапшыру гадәти саналган төбәкләрнең берсе. “Конкурс киләчәктә дә уздырылыр”, дигән ышаныч белдерде ТР вице-премьеры.

Татарстан Республикасы Премьер-министры урынбасары – ТР сәнәгать һәм сәүдә министры, сыйфат өчен ТР Хөкүмәте премияләрен бирү буенча совет рәисе Равил Зарипов хәбәр иткәнчә, 2014 елда конкурска 86 оешма заявка биргән, шул исәптән Татарстаннан читтә хуҗалык итүче субъектлардан 6 заявка килгән. Казан, Чаллы, Әлмәт, Түбән Кама шәһәрләре, шулай ук Лаеш, Алексеев, Яшел Үзән районнары предприятиеләре һәм оешмалары зур активлык күрсәткән. Сәламәтлек саклау һәм социаль хезмәтләр, төзелеш һәм мәгариф өлкәләрендә эшләүче сәнәгать предприятиеләре, оешмалары конкурста актив катнашкан.

Совет карары белән 7 оешмага конкурс лауреаты исеме бирелгән, 19ы дипломант булган.
Сыйфат өчен Татарстан Республикасы Хөкүмәте премияләренә 2014 елда түбәндәге оешмалар лаек булды:
производство өчен продукция һәм халык кулланышындагы товарлар җитештерү өлкәсендә эшчәнлек алып баручы, эшчеләр саны 250 дән артык предприятие һәм оешмалар категориясендә – Түбән Каманың “Түбән Кама нефтехим” ААҖ;
хезмәт күрсәтү өлкәсендә эшчәнлек алып баручы, хезмәткәрләре 250 дән артык предприятин һәм оешмалар категориясендә – “Казан Гипронииавиапромы” ЯАҖ (Казан ш.), “Татарстан Республикасы сәламәтлек саклау министрлыгының Республика балалар клиник хастаханәсе” (Казан ш.), “Татспецтранспорт” идарәче ширкәте” ҖЧҖ (Әлмәт ш.);
халык кулланышындагы товарлар һәм сәнәгый билгеләнештәге продукция җитештерү өлкәсендә эшчәнлек алып баручы, эшчеләр саны 250 дән артмаган предприятиеләр категориясендә – “АК БАРС Строй” ҖЧҖ (Казан ш.);
хезмәт күрсәтү өлкәсендә эшчәнлек алып баручы, хезмәткәрләре 250 дән артмаган оешмалар категориясендә – “Әлмәт политехник техникумы” (Әлмәт ш.), “Республика медицина китапханә-мәгълүмат үзәге” (Казан ш.).

Бүләкләү тантанасы тәмамланганда Алексей Песошин лауреатларны котлады һәм аларга киләчәктә дә уңышлар теләде, һәм шулай ук чираттагы 11 конкурсның башлануын игълан итте.