Лаешта аварияле торактан күченүчеләргә яңа фатир ачкычлары тапшырылды

Бүген Лаешта гражданнарны аварияле торактан күчерү программасында катнашучыларга тантаналы шартларда яңа фатир ачкычлары тапшырылды. Чарада ТКХ реформалаштыруга ярдәм фонды идарә рәисе - генераль директоры Константин Цицин, фондның күзәтү советы рәисе Сергей Степашин, ТР Президенты Аппараты җитәкчесе Әсгать Сәфәров, Лаеш районы башлыгы Михаил Афанасьев, ТР төзелеш, архитектура һәм ТКХ министры Ирек Фәйзуллин, ТР Президенты каршындагы Дәүләт торак фонды башкаручы директоры Тәлгать Абдуллин катнашты.

Өй туйларын бәйрәм итүчеләрне сәламләп, район башлыгы бүген гражданнарны аварияле торактан күчерү программасы буенча төзелгән 24 фатирлы йорт тапшырылганны билгеләп үтте.
"Без бу көнне түземсезләнеп көттек һәм Яңа ел алдыннан кешеләрне шундый бүләк алуы белән бик горурланабыз. Әлбәттә, бу бик зур бәхет", - дип ассызыклады Михаил Афанасьев. Аның сүзләренчә, республика җитәкчелеге әлеге программаны тормышка ашыруга игътибар күрсәтмәсә, боларны эшләп булмас иде.

"Торак төзелеш - өстенлекле мәсьәлә, Татарстан Президенты аны үз игътибырында тота. Атна саен бу мәсьәлә буенча киңәшмә үткәрелә", - диде ТР Президенты Аппараты җитәкчесе Әсгать Сәфәров, быел Татарстанда 2,4 квадрат метрдан артык торак файдалануга тапшырылды дип тә өстәде.

Чарада ТКХ реформалаштыруга ярдәм фондының күзәтү советы рәисе Сергей Степашин: "Татарстан быел аварияле торактан күчерү программасын үтәде дип кыю рәвештә әйтергә була. Алга таба да бергә эшләүне дәвам итәрбез", - дип белдерде. Аның сүзләренчә, торакның сыйфатлы булуы мөһим. Ул төзүчеләргә эшләре өчен рәхмәт белдерде. "Ә сезгә күпме еллар түзеп яшәгәнегез өчен рәхмәт әйтергә телим, - диде С.Степашин яңа фатир хуҗаларына мөрәҗәгать итеп. - Кешеләрнең яхшы шартларда яшәве - дәүләтнең бурычы ул".

Кунаклар өй туйларын уздыручыларга күптән көтелгән фатир ачкычларын тапшырды. Символик тасманы кискәннән соң, кунаклар фатирларның берсендә кунакта булды, анда яшәүче кешеләр белән аралашты.

Әйтергә кирәк, 24 фатирлы йортны төзү июнь аенда башланган, ә декабрь аенда ул файдалануга ташырылган. Бинаның гомум мәйданы - 1 мең квадрат метрдан артык. Йортта 12 бер бүлмәле (гомум мәйданы 35,6 квадрат метр), 12 ике бүлмәле фатир (гомум мәйданнары 53,7 һәм 60,4 квадрат метр). Йортның смета бәясе - 28,6 миллион сум.

Моннан тыш, программада катнашучыларны күчерү өчен 731,4 квадрат метрлы тагын бер 16 фатирлы йорт төзелгән. Өстәвенә, Рождественский авыл җирлегендә муниципаль бюджет хисабына тагын ике фатир төзекләндерелгән.