ТР мәдәният хезмәткәрләренең уртача хезмәт хакы 18 мең сум тәшкил итә

Татарстан Республикасы мәдәният хезмәткәрләренең уртача хезмәт хакы агымдагы елның 9 ае буенча 17 889,7 сум тәшкил иткән, яисә Татарстан Республикасы икътисады буенча уртача хезмәт хакының 65,3%ы (27 401,3). Бу хакта бүген ТР Министрлар Кабинетында узган брифингта ТР мәдәният министры Айрат Сибагатуллин хәбәр итте.

2014 елда Татарстанда 47 күп функцияле мәдәният үзәкләре ачылган. Барлыгы 2012 елдан төбәктә 139 үзәк төзелгән. Министр шулай ук мәдәният учреждениеләренең автопаркы сизелерлек яңарды, дип өстәде. Муниципаль мәдәният учреждениеләре өчен 27 “Лада Лагрус” автомобиле бирелгән, шул исәптән 18е – федераль акча хисабына. Яңа төзелгән авыл клублары өчен 4,7 млн сумга җиһазлар кайтарылган.

Авылларда һөнәри сәнгатьне алга җибәрү өчен һөнәри иҗат коллективларының 400 концерты һәм театраль тамашалар, татар эстрадасы йолдызларының 50 концерты, иҗади берләшмә әгъзаларының 70тән артык очрашуы, Татарстан музейларының 30дан артык күчмә күргәзмәләре оештырылган.

Республика районнарында гадәттәгечә “Йолдызлык”, “Безнең йорт – Татарстан”, “Салават күпере”, “Татар моңы”, “Идел йорт” һ.б. республика фестивальләре һәм конкурслары узды.

2014 елда “Иң яхшы муниципаль мәдәният оешмасы” һәм “Иң яхшы авыл мәдәният хезмәткәре” конкурсына федераль бюджеттан 6,4 млн сум акча бүлеп бирелгән. ТР бюджетыннан мәдәният учреждениеләре һәм хезмәткәрләренә грантлар өчен ел саен 18 млн сум бүлеп бирелә.