Илдар Халиков: “ Җәзаларны үтәтү федераль хезмәтенең ТР буенча идарәсенең төп нәтиҗәсе – гадәттән тыш хәлләрнең булмавы”

2014 елда Татарстанда гадәттән тыш хәлләрнең булмавы – бу Җәзаларны үтәтү федераль хезмәтенең ТР буенча идарәсе эшчәнлегенең төп нәтиҗәсе.
Бу хакта бүген Җәзаларны үтәтү федераль хезмәтенең Татарстан Республикасы буенча идарәсенең йомгаклау коллегиясендә Татарстан Премьер-министры Илдар Халиков хәбәр итте.

Идарә эшчәнлеге нәтиҗәләре хакында төп докладны идарә башлыгы Дәүфит Хамадишин ясады. Аның сүзләренчә, Татарстанда махсус контингентта булучыларның саны бер ел эчендә 100 кешегә кимегән һәм 2015 елның 1 гыйнварына 12316 кеше тәшкил иткән. Чагыштыру өчен – 2000 елда махсус учреждениеләрдә 20 меңгә кадәр кеше тотылган.

“Без аңлыйбыз, икътисади вәзгыять катлаулы булу сәбәпле, махсус контингент санының артуы мөмкин”, - дип билгеләде Д. Хәмәдишин.
Татарстанда хөкем ителгәннәрнең төп массасы – 80 проценттан артыгы ирегеннән авыр һәм үтә авыр җинаятьләр кылган өчен мәхрүм ителгән. Һәр өченчесе үтерү һәм кеше сәламәтлегенә алдан уйлап җитди зыян салып, аның үлеменә китерү, һәр бишенчесе наркотикларның законсыз әйләнеше белән бәйле җинаятьләр өчен хөкем ителгән. Хөкемгә тартылган затларның 65 процентка якыны иректән мәхрүм итү урыннарына кабат килеп эләккән.

Татарстан прокуроры Илдүс Нәфыйков үзенең чыгышында җәзаларны үтәтү системасында уңай үзгәрешләр булуын билгеләде. Идарә алдында торган төп бурычларның берсе буларак ул экстремизмга һәм терроризмга каршы көрәшне атады.

“Иң мөһиме, Татарстанда иректән мәхрүм итү урыннарында гадәттән тыш хәлләр һәм авыр җинаятьләр булмады”, - дип Илдар Халиков идарә эшчәнлеген уңай бәяләде һәм аларга ТР Президенты, ТР Хөкүмәте исеменнән рәхмәт белдерде.

Ул наркотиклар һәм кәрәзле элемтә чараларын йолып алу күрсәткечләренең артуын билгеләде, аның сүзләренчә, бүгенге вәзгыятьтә бу аеруча мөһим. “Тикшерелә торган күп кенә җинаятьләр буенча без элеккечә җинаятьчеләрнең иректән мәхрүм итү урыннарында булганнар белән элемтәсе барлыгын күрәбез”, - дип ассызыклады И. Халиков.

Аның фикеренчә, телефоннарны йолып алу, Универсиадага алынган интроскопларны куллану эшен дәвам иттерергә кирәк.
“Спиртлы эчемлекләрне йолып алу буенча да җитди эш уздырылган. Бу эшне дә дәвам итәргә кирәк”, - дип белдерде Илдар Халиков.

Илдар Халиков 2014 елда төрмәдә утыручыларның көнкүреш шартларын яхшыртуга, медицина хезмәте күрсәтүгә игътибар бирелүен белдерде. “Бу кешеләр хөкем ителгән булуларына карамастан, алар Россия гражданнары булып кала, һәм без аларны барлык конституцион хокуклар белән тәэмин итәргә тиешбез”, - диде Татарстан Хөкүмәте башлыгы.


Гомумән, Илдар Халиков сүзләренчә, 2014 ел Җәзаларны үтәтү федераль хезмәтенең ТР буенча идарәсе өчен барлык төп күрсәткечләр буенча уңышлы узган. Шуның өчен ул идарә хезмәткәрләренә тагын бер кабат рәхмәт белдерде һәм дәүләт бүләкләрен тапшырды.