Илдар Халиков: “2015 ел Татарстанның юл-транспорт тармагы алдына яңа бурычлар куя”

2015 елда Татарстанның юл-транспорт тармагына мөһим бурычларны хәл итәргә, шулай ук эшчәнлекнең гомуми нәтиҗәлелеген арттырырга туры киләчәк. Бу хакта бүген Татарстан Премьер-министры Илдар Халиков ТР Транспорт һәм юл хуҗалыгы министрлыгының йомгаклау коллегиясендә чыгыш ясаганда белдерде. Коллегия эшендә шулай ук Федераль юл агентлыгы җитәкчесе Роман Старовойт, Татарстан Республикасы буенча баш федераль инспектор Ренат Тимерҗанов, юл-транспорт тармагы предприятиеләре җитәкчеләре катнашты.

Татарстанның транспорт һәм юл хуҗалыгы министры Ленар Сафин 2014 елда республиканың юл-транспорт комплексы эшчәнлегенә нәтиҗә ясады һәм 2015 елга бурычлар билгеләде.

2014 нче елда юл-транспорт комплексын финанслау күләме 37, 78 млрд сум тәшкил иткән, шул исәптән республика бюджетыннан – 25,31 млрд сум, федераль бюджеттан – 11,61 млрд сум, 850 млн сум – муниципаль юл фондлары акчасы.

Транспорт тармагын финанслауның күләме 4,46 млрд сум, юл тармагын финанслауның күләме 33,32 млрд сум тәшкил иткән. Транспорт тармагы предприятиеләрендә уртача хезмәт хакы 2014 елда 32624 сум булган, 2013 нче ел белән чагыштырганда, ул 9,8 %ка арткан. Юл төзелеше предприятиеләрендә эшләүчеләрнең уртача хезмәт хакы 29050 сум тәшкил иткән, 2013 нче ел белән чагыштырганда 10,2%ка күбрәк.

2015 елга куелган бурычлар турында сөйләгәндә Ленар Сафин, министрлык “Казан” аэропортын үстерү һәм аның пассажирлар агымын арттыру өстендә эшләвен дәвам итәчәк, дип хәбәр итте. Җәйге программада Красноярск, Иркутск шәһәрләренә рейслар ачу, Санкт-Петербургка рейсларны арттыру планлаштырыла.

Министр сүзләренчә, якын араларда “Татнефть” ярдәме белән яңа авиакомпания булдырылачак, ул үзенең эшен икенче кварталдан башларга җыена.
Turkish Airlines и Flydubai авиакомпанияләре чит илләргә даими рейсларын дәвам итәләр. Шулай ук аэропорт China Southern авиакомпаниясе белән сөйләшүләр алып бара, һәм җәйге расписаниядә Кытайның Өремче шәһәренә рейс кертүне планлаштыра.

Ленар Сафин сүзләренчә, 2015 елга куелган иң мөһим бурычларның берсе – Казанда спортның су төрләре буенча дөнья чемпионатын транспорт белән тәэмин итү.

2015 елда каты өслекле юллар белән Татарстанның тагын 50 торак пунктын тоташтыру планлаштырыла.

Илдар Халиков үзенең чыгышында юл-транспорт тармагының республиканың тулай төбәк продукты күләменә керткән өлешенең 11,2 % булуын билгеләп узды. 2013 ел белән чагыштырганда бу күрсәткеч арткан.

Казанда Универсиада һәм Сочида Олимпиада уздыру, Илдар Халиков сүзләренчә, республика транспортчыларының югары дәрәҗәсен күрсәтте. “2015 ел безнең алга яңа бурычлар куя. Транспорт һәм юл хуҗалыгы министрлыгы быелгы чемпионатны да транспорт белән тәэмин итүне уңышлы башкарачагына ышанам”, - дип белдерде Премьер-министр.

“Казан” Халыкара аэропорты өчен дә 2015 ел җитди сынау елы булачак, диде ТР Хөкүмәте башлыгы.
Ул шулай ук пассажирлар ташучы җәмәгатьчелек автобусларының санитар торышына, хезмәт күрсәтү сыйфатына игътибар итәргә кушты. Тимер юл транспортында шәһәр яны тимер юл челтәрендә эш нәтиҗәлелеген арттырырга һәм пассажирлар өчен уңайсызлыкларны киметергә кирәк, диде.

“Су юлы транспортына килгәндә, соңгы елларда күрсәткечләрнең түбәнәюе күзәтелә. 2015 ел навигациясенә ике тизйөрешле “Метеор” яңартылырга тиеш,- дип белдерде Илдар Халиков. - 2015 елның җәендә Болгарга һәм Зөягә туристларның күпләп килүекөтелә, моңа әзер булырга кирәк”.

“2015 ел барлык икътисад өчен катлаулы ел булачак. Әмма безнең шундый катлаулы чорларны узганыбыз бар инде, мондый вакытта нәтиҗәлерәк эшләргә кирәк”, - дип ассызыклады Татарстан Премьер-министры.

Үзенең чыгышыннан соң Илдар Халиков алдынгы хезмәткәрләргә дәүләт бүләкләрен тапшырды.