Гадәттән тыш хәлләр министрлыгы тарафыннан 2014 елда Татарстанда 8 мең кеше коткарылган

2014 елда Татарстанда Гадәттән тыш хәлләр министрлыгы хезмәткәрләре тарафыннан 8 мең кеше коткарылган. Башкарылган эшләрнең нәтиҗәлелеген билгеләү өчен, кеше тормышының уртача икътисади бәясен билгеләү буенча тикшеренүләр уздырылган һәм икътисади нәтиҗәлелекнең 20 миллиард сумны тәшкил итүе ачыкланган.

Бу хакта бүген ведомство коллегиясенең киңәйтелгән утырышында Татарстан Республикасы гражданнар оборонасы эшләре һәм гадәттән тыш хәлләр министры – Россия Гадәттән тыш хәлләр министрлыгының Татарстан Республикасы буенча Баш идарәсе башлыгы Рафис Хәбибуллин хәбәр итте.

Чарада шулай ук, ТР Премьер-министры вазыйфаларын башкаручы Алексей Песошин, Россия Гадәттән тыш хәлләр министрлыгының Идел буе төбәге үзәге җитәкчесе Игорь Паньшин, ТР Дәүләт Советының законлылык һәм хокук тәртибе комитеты рәисе урынбасары Рафил Ногманов һ.б. рәсми затлар катнашты.

2015 ел Россия Гадәттән тыш хәлләр министрлыгы өчен дә түгәрәк дата − әлеге ведомство оешуга 25 ел була, аның ТР буенча идарәсенә 20 ел.

Узган ел Россия Гадәттән тыш хәлләр министрлыгының ТР буенча Баш идарәсе эшчәнлегендә янгын сүндерү, янгыннарны булдырмый калу буенча профилактика эшләренә басым ясалган. Аеруча Яшел Үзән, Мамадыш, Нурлат, Спас, Чирмешән районнары янгын сүндерүчеләре бу юнәлештә актив эш алып барган.

Игорь Паньшин Татарстандагы хезмәткәрләренең эшен югары бәяләде. Аеруча Украина качакларына күрсәтелгән ярдәм өчен рәхмәт белдерде: Татарстан Республикасы 2014 елда хәрби бәрелешләр барган күрше дәүләттән 17 меңләп качак кабул иткән.

Илдәге икътисали шартлар кыенлашу сәбәпле, Гадәттән тыш хәлләр министрлыгының бюджеты 30 процентка киметелгән. Шуңа бәйле рәвештә, Игорь Паньшин ресурсларны кулдан килгән кадәр экономияләргә, дәүләт акчаларын юкка сарыф итмәскә өндәде. 2015 ел, ведомство өчен икътисади яктан аеруча да авыр булачагын ассызыклады.

Шулай ук ул республикада уздырылачак дөньякүләм чараларда ведомство вәкилләре үзләрен бары уңай яктан күрсәтәчәкләренә ышанычын белдерде. “Универсиада ХХVII җәйге уеннары вакытында тупланган тәҗрибә Сочи шәһәрендә үткәрелгән Олимпия һәм Паралимпия уеннары вакытында да кулланылды. Быел Татарстан Спортның су төрләре буенча XVI Дөнья чемпионатын кабул итәргә әзерләнә. Әлеге ярышлар вакытында да халыкның һәм спортчыларның иминлеге югары дәрәҗәдә сакланачагына шигем юк”, - диде Игорь Паньшин чыгышында.

ТР Хөкүмәте башлыгы вазифаларын башкаручы Алексей Песошин ТР Гадәттән тыш хәлләр министрлыгының эшен югары бәяләп, узган елгы күрсәткечләр әлеге ведомствоның нинди дәрәҗәдә күрсәтүен ассызыклады.

Шулай ук, гадәттәш тыш хәлләрнең азаюын ул хәлләрдә зыян күргән кешеләрнең саны кимүен, берничә ел дәвамында урман янгыннары булдырылмый калуны һ.б. уңай күрсәткечләр ведомство хезмәткәрләренең тырышлыгы нәтиҗәсе, дип атады.

“Ведомство һәрвакыт оешканлык, югары профессиональлек, кирәк вакытта иҗади якын килү күрсәтә. Каршыларында килеп туган кыенлыкларга да карамастан, ТР Гадәттән тыш хәлләр министрлыгы быел үзләренең эшләрен тиешенчә башкарырлар дип ышанасы килә. 2015 ел җиңел булыр дип әйтеп булмый. Шуңа да карамастан, халык иминлеген тәэмин итүне югары дәрәҗәдә оештырырга кирәк. Әмма бу чаралар халыкка сизелмичә һәм кыенлыклар тудырмыйча гына башкарылырга тиеш”, - дигән максатлар куйды Алексей Песошин.

Чара ахырында алдынгы хезмәткәрләргә дәүләт бүләкләре тапшырылды.