ТР Премьер-министры Илдар Халиков Биектау авылында яңа балалар бакчасында булды

Бүген Татарстан Премьер-министры Илдар Халиков Биектау муниципаль районында Биектау авылында яңа балалар бакчасында булды.

Катнаш типтагы “Сандугач” балалар бакчасы республика программасы кысаларында төзелгән. Объект узган елның февралендә төзелә башлаган, октябрьдә файдалануга тапшырылган. Балалар бакчасының гомуми мәйданы 4720 кв метр, төзелеш чыгымнары 130 млн сум тәшкил иткән. 260 урынга исәпләнгән мәктәпкәчә мәгариф учреждениесендә 14 төркем эшли, музыка һәм спорт залы, логопед, психолог, татар теле, методика бүлмәләре, медицина блогы, азык-төлек, кер юу бүлмәләре, 14 спорт-уен мәйданчыклары бар. Биредә, өстәмә рәвештә, инглиз теле, хореография, спорт түгәрәкләре дә эшли. Балалар бакчасы территориясендә шулай ук зур спорт мәйданчыгы урнашкан.

Татарстан Премьер-министры Илдар Халиков балалар бакчасындагы шартлар белән танышты, шулай ук балалар катнашындагы музыкаль тамашаны карады.

Илдар Халиков Биектау районында шулай ук район үзәгендә яңа торак комплекс төзелеше белән танышты. “Весенний” торак комплексына гомуми мәйданы 5,3 мең кв метрдан артык булган өч йорт керә, фартирлар саны -108. Комплекс узган елның май аенда төзелә башлаган, бүгенгә бер йорт тапшырылган. Агымдагы елның августында торак комплексны файдаланылышка тулысынча тапшыру планлаштырылган.

Алга таба Татарстан Премьер-министры Биектау муниципаль районы Советы утырышында катнашты. Утырыш башланыр алдыннан Илдар Халиков җирле сәнәгать һәм авыл хуҗалыгы предприятиеләре продукциясе күргәзмәсе белән танышты.