2014 елда Татарстан суд приставлары 8,5 млрд. сум акча түләттергән

2014 елда Россия Федераль суд приставлары хезмәтенең ТР буенча идарәсе башкарма гамәлләр нәтиҗәсендә 8,5 миллиард сум акча түләткән, шул исәптән 2,9 миллиард сумы консолидацияләнгән бюджетка, дип хәбәр итте бүген ведеомствоның коллегия утырышында идарә җитәкчесе - ТРның баш суд приставы Радик Ильясов.
Бу чарада шулай ук Федераль суд приставлары хезмәте директоры - Россия баш суд приставы Артур Парфенчиков, ТР Премьер-министры Илдар Халиков катнашты.

2014 елда идарә үтәлешендә 1 миллион 951 мең башкарма производство булган, бу 2013 ел белән чагыштырган вакытта 547 мең яки 39 процентка күбрәк.
Былтыр 1 миллион 37 мең производство тәмамланган, аларның 811 меңе фактик үтәлеш белән, бу 2013 ел белән чагыштырган вакыттта 342 меңгә күбрәк. Узган елда идарә беренче тапкыр "Фактик үтәлеш белән тәмамланган башкарма производстволар өлеше" күрсәткечен үтәгән, бу 47,21 процентны тәшкил иткән. "Димәк, һәр икенче башкарма производство буенча, таләп итүче суд яки башка орган карары белән үзенә тиешлене алган", - дип өстәде республиканың баш суд приставы.

Радик Ильясов билгеләп узганча, фактик үтәлеш өлеше артуга йогынты ясаган төп факторларның берсе булып күп кенә оешмалар һәм хакимият органнары белән электрон документ әйләнешенә күчү тора. Әйтик, 2014 елда 25 банк белән электрон документ әйләнеше турындагы килешү гамәлдә булган, бу әҗәтлеләрнең счетларын ачыкларга һәм аларга арест салырга мөмкинлек биргән.

2014 елда РФ Пенсия фондының ТР бүлеге белән электрон документ әйләнеше кертелгән. Бу бурычлыларның табышлары турындагы мәгълүматны алырга булышкан, шуның нәтиҗәсендә 62 мең башкарма производство тәмамланган.

Узган ел Дәүләт автомобиль инспекциясе салган штрафларны түләтү турындагы 754 мең 899 башкарма производство үтәлүдә булган. Аларның 508 мең 653е фактик үтәлеш белән тәмамланган. Дәүләт автомобиль инспекциясе тарафыннан салынган штрафларны түләтү буенча фактик үтәлеше дәрәҗәсе 93,8 процентны тәшкил иткән.

Идарә Татарстан бюджетына 2014 елда 1 миллиард 981 миллион сум акча күчергән, бу 2013 ел белән чагыштырган вакытта 45,7 процентка күбрәк. Ул чакта бюджетка 1 миллиард 360 миллион сум акча күчерелгән булган. Ведомствоның 2015 елның планнары турында сөйләгәндә, Р.Ильясов фактик үтәлеш белән тәмамланган производстволар күләмен 50 процентка кадәр җиткерү бурычын куйды.

Артур Парфенчиков үз чыгышында билгеләп узганча, фактик үтәлеш белән тәмамланган башкарма производстволар өлеше 47 процентны тәшкил итү - бу "шактый җитди күрсәткеч". Ул шулай ук әлеге күрсәткечне 50 процентка кадәр җиткерү бурычын үтәп була, дип белдерде.
"Коллегия карарында конкрет чаралар билгеләүгә басым ясалырга тиеш", - дип ассызыклады ул.

Илдар Халиков исә үз чыгышында, 2015 елда республика ил һәм республика икътисадында хәвефле тенденцияләр чорына аяк басты, дип билгеләп үтте. ТР Премьер-министры ассызыклаганча, мондый шартларда идарәнең роле арта. "Ведомство эшенең нәтиҗәлелеге турыдан-туры бөтен дәрәҗә бюджетларга акча килүгә йогынты ясый һәм бу, үз чиратында, социаль өлкәне финанслауда чагыла, Татарстан Республикасында яшәүчеләрнең тормыш сыйфатын арттыруга булыша", - диде ул һәм 2014 елда идарәнең җитди уңышларга ирешүен өстәде. ТР Хөкүмәте исеменнән ведомство хезмәткәрләренә эшләре өчен рәхмәт белдерде.

Илдар Халиков билгеләп узганча, узган ел ведомство Татарстанның зур банклары белән электрон документ әйләнешен активлаштыруга басым ясаган. "Саклык банкы белән андый эш алып барыла инде. Бүгенге көндә "Ак Барс банк" һәм "Акибанк" белән хезмәттәшлеккә ирешелгән. Бүгенге коллегия карарына мин Татарстан Милли банкына республиканың башка банклары белән дә андый эшләр алып бару турында тәкъдимне кертүегезне сорыйм", - диде ТР Премьер-министры.