Илдар Халиков “Ел хатын-кызы. Ел ир-аты: хатын-кыз карашы”республика конкурсы җиңүчеләренә бүләкләр тапшырды

Бүген Татарстан Премьер-министры Илдар Халиков “Ел хатын-кызы. Ел ир-аты: хатын-кыз карашы” республика конкурсы җиңүчеләренә бүләкләр тапшырды. Бу тантаналы чара Казанның “Пирамида” мәдәни-күңел ачу комплексында узды.

Үзенең сәламләү сүзендә Илдар Халиков, конкурста катнашучы һәр хатын-кыз хезмәте, карьерасы һәм иҗади казанышлары белән үз эшенең остасы икәнен исбатлады, дип билгеләде. “Мин Татарстан Президенты Рөстәм Миңнеханов исеменнән Сезне Халыкара хатын-кызлар көне белән котлап, иң изге теләкләрне җиткерәм”, - дип өстәде Премьер-министр.

Илдар Халиков хатын-кызларның бүгенге көндә төрле өлкәләрдә – медицина һәм мәгариф, машина төзелеше һәм нефть химиясендә ир-атлар белән бер рәттән уңышлы эшләүләрен ассызыклады.
“Мин Сезгә чын күңелемнән бу март бәйрәмнәренең күңелле узуын телим. Сезнең йөзегездә һәрвакыт елмаю балкысын, яныгызда һәрвакыт якыннарыгыз һәм яраткан кешегез булсын”, - диде Илдар Халиков.

Исегезгә төшерәбез, бу конкурс Татарстанда 1993 елдан бирле уздырыла. 2015 елда катнашучыларны сайлау 10 номинация буенча узган: “Хатын-кыз – ана”, “Хатын-кыз – мәдәният һәм рухилык”, “Хатын-кыз – галимә”, “Минем язмышым – минем һөнәрем” (производствода эшләүче), “Хатын-кыз – лидер”, “Хатын-кыз – бизнес-леди”, “Өченче буын героинясы”, “Хатын-кыз – ел үрнәге”, һәм шулай ук “Ир-ат – мәрхәмәтле йөрәк”, “Ир-ат – лидер”.

Конкурсның республика этабында 15 кеше җиңүче булды, шул исәптән Казан федераль университеты укытучысы Роза Вәлиева (“Хатын-кыз – галимә” номинациясе), “Диод технологияләре” компаниясе директоры Надежда Бабкина (“Хатын-кыз – бизнес-леди”) , Казанның “Новая музыка” камера оркестры Анна Гулишамбарова (“Хатын-кыз – мәдәният һәм рухилык), РФА академигы Ренат Акчурин (“Ир-ат – лидер”).
Барлык җиңүчеләргә дә Илдар Халиков истәлекле бүләкләр тапшырды.