Алексей Песошин: Төп бурыч – җимереклекләрне чистарту һәм “Адмирал” сәүдә үзәгендәге янгында зыян күрүчеләргә барлык тиешле ярдәмне күрсәтү

Җимереклекләрне чистартып бетерү һәм зыян күрүчеләргә барлык тиешле ярдәмне күрсәтү – коткару хезмәте вәкилләре алдына шундый бурычларны ТР Премьер-министрының беренче урынбасары – Татарстан Республикасының гадәттән тыш хәлләр һәм янгын куркынычсызлыгын тәэмин итү буенча комиссия рәисе Алексей Песошин куйды.

Гадәттән тыш хәлләр буенча комиссия кысаларында тәүлек буенча эшләүче оператив штаб булдырылган, дип хәбәр итте Алексей Песошин журналистларга. Хәзер төп бурыч – җимереклекләр астында калган кешеләрне эзләү эшләрен оештыру, дип ассызыклады ул.

Татарстан Президенты Рөстәм Миңнеханов бүген янгын вакытында зыян күрүчеләргә матди ярдәм күрсәтү турында йөкләмә бирде, дип искәртте Алексей Песошин. Янгын вакытында үлүчеләрнең гаиләләренә республика казнасыннан 1 млн. сум бүлеп биреләчәк, төрле дәрәҗәдә имгәнүчеләр 200 меңнән 400 меңгә кадәр акча алачак, янгын вакытында үлгән чит ил гражданнарының гаиләләренә мәетләрне үз илләренә алып кайтуда ярдәм күрсәтеләчәк. Янгын нәтиҗәсендә имгәнүләр алган чит ил гражданнарына республиканың дәвалау учреждениеләрендә түләүсез медицина ярдәме күрсәтеләчәк.

Бүген шулай ук “Адмирал” сәүдә үзәгендәге янгын урынында Алексей Песошин оператив киңәшмә уздырды, анда эзләү-коткару эшләренең барышы турында хисап бирелде. Киңәшмәдә Россия Гадәттән тыш хәлләр министрлыгының Идел буе төбәге үзәге башлыгы Игорь Паншин, ТР Иминлек советы секретаре Айрат Шәфигуллин, Россия Гадәттән тыш хәлләр министрлыгының ТР буенча башлыгы Рафис Хәбибуллин катнашты.