Татарстанда санитар-экологик икеайлык башлана

2015 елның 1 апреленнән Татарстанда санитар-экологик икеайлык башлана. Бүген бу хакта Татарстан Республикасы Министрлар Кабинетында узган брифингта ТР экология һәм табигать ресурлары министры урынбасары – табигатьне саклау буенча баш дәүләт инспекторы Рамил Низамов белдерде. Бу чара Татарстанның барлык муниципаль районнары белән видеоконференцэлемтә режимында узды.

Брифингта шулай ук ТР урман хуҗалыгы министрының беренче урынбасары Харис Мусин, Казан шәһәре башкарма комитетының тышкы төзекләндерү комитеты рәисе Рәйес Зәйнетдинов катнашты.

Рамил Низамов сүзләренчә, шундый экологик чаралар Татарстанда инде берничә ел уздырыла.
Ул ассызыклаганча, икеайлык кысаларында быел беренче тапкыр күзәтчелек органнары тарафыннан ачыкланган рөхсәтсез урыннарда хасил булган чүплекләр “Татарстан Республикасының экологик картасы” (karta.tatar.ru) геомәгълүмати системасына урнаштырылачак. Барлык муниципалитетлар бу мәгълүмати ресурс ярдәмендә көн саен экологик вазгыятьне контрольда тота алачак, дип өстәде ТРның табигатьне саклау буенча баш дәүләт инспекторы.

“Шулай ук гражданнардан 267-68-67 номерлы “кайнар линия”се, ТР дәүләт порталындагы “Халык контроле” һәм “Мәктәп эко-патруле” системалары буенча кабул ителгән мөрәҗәгатьләр дә әлеге картага урнаштырылачак”, - дип белдерде Рамил Низамов.

Брифинг барышында журналистларга Татарстан территориясендәге чүплекләрне ачыклау максатында транспортның барлык төрләре файдаланылачак, дип хәбәр ителде.
Горький тимер юлы (Казан ш., Лаеш, Яшел Үзән, Биектау муниципаль районнары), Куйбышев тимер юлы (Тукай, Түбән Кама, Зәй, Әлмәт муниципаль районнары) янындагы, шулай ук М-7 федераль трассасы янындагы территорияләргә аерым игътибар биреләчәк.