Рөстәм Миңнеханов: Татарстан Куба белән инновацион мәйданчыклар, махсус икътисадый зоналар булдыру тәҗрибәсен уртаклашырга әзер
Татарстан Республикасы Куба белән инновацион мәйданчыклар, махсус икътисадый зоналар булдыру тәҗрибәсен уртаклашырга әзер. Бүген бу хакта Татарстан Республикасы Президенты вазыйфаларын вакытлыча башкаручы Рөстәм Миңнеханов Куба Республикасы Министрлар Советы Рәисе урынбасары, Сәүдә-икътисадый һәм фәнни-техник хезмәттәшлек буенча Россия-Куба хөкүмәтара комиссиясе рәистәше Рикардо Кабрисас Руис белән очрашуда хәбәр итте.
Очрашу Казан Кремлендә узды.
Кунакларны сәламләп, Рөстәм Миңнеханов Куба Республикасы җитәкчелегенә бу визитны оештыруда ярдәм иткәне һәм Татарстан Республикасы делегациясенең 2014 елның ноябрендә Кубага эш сәфәре барышында күрсәтелгән кунакчыллыклары өчен рәхмәт белдерде.
Иртәгә, 22 апрельдә, Казанда Сәүдә-икътисадый һәм фәнни-техник хезмәттәшлек буенча Россия-Куба хөкүмәтара комиссиясе утырышы узачак, диде Рөстәм Миңнеханов, һәм бу –Татарстан өчен әһәмиятле вакыйга. Бүген Россия һәм Куба региональ хезмәттәшлек мәсьәләләренә җитди игътибар бирә, диде Рөстәм Миңнеханов һәм, Куба делегациясенең Казанга визиты Татарстан-Куба мөнәсәбәтләренә яңа импульс бирәчәк, дип өмет белдерде.
Татарстан белән Куба арасында Икътисадый хезмәттәшлек турында1996 елгы килешү бар, диде ул, 1999 елдан Кубада Татарстан Республикасының сәүдә-икътисадый вәкиллеге эшли. Татарстан Кубага вертолетлар, авиация техникасы, шулай ук «КАМАЗ» ААҖ продукциясен җибәрә. Рөстәм Миңнеханов хәбәр иткәнчә, перспектив юнәлешләр – Кубада «КАМАЗ» ААҖ җыю производствосын оештыру, сервис үзәкләре булдыру. Моннан тыш, «Түбән Кама шина» ААҖ шиннары да – Кубада кирәк товар.
Рөстәм Миңнеханов шулай ук мәгариф өлкәсендә Куба һәм Татарстан югары уку йортлары арасында хезмәттәшлекне дәвам итәргә кирәк, дип саный.
Татарстан Республикасы Президенты вазыйфаларын вакытлыча башкаручы Рөстәм Миңнеханов сүзләренә караганда, медицина, биотехнологияләр, фармацевтика, мәгълүмат технологияләре, инновацияләр дә – өметле юнәлешләр.
Бүген Татарстан инновацион мәйданчыклар, махсус икътисадый зоналар булдыру буенча җитди тәҗрибә туплады һәм ул аны Куба белән уртаклашырга әзер, дип белдерде Рөстәм Миңнеханов.
Үз чиратында Куба Республикасы Министрлар Советы Рәисе урынбасары, Сәүдә-икътисадый һәм фәнни-техник хезмәттәшлек буенча Россия-Куба хөкүмәтара комиссиясе рәистәше Рикардо Кабрисас Руис бу өлкәләрдә Татарстан тәҗрибәсен өйрәнергә әзер булуларын белдерде. Ул хәбәр иткәнчә, бүген Куба 2030 елга һәм якындагы бишьеллыкка (2016-2020 еллар) социаль-икътисадый үсеш юлында, шулай ук махсус икътисадый зоналар булдыру һәм чит илләр инвестицияләрен җәлеп итү белән кызыксына.
Без Татарстанга сезнең тәҗрибәне өйрәнү өчен Куба делегациясен җибәрергә әзер, дип белдерде Рикардо Кабрисас Руис, Рөстәм Миңнехановка мөрәҗәгать итеп.
Ул шулай ук билгеләп үткәнчә, «КАМАЗ» ААҖ белән Куба арасындагы хезмәттәшлек яңа үсеш этабында.
Очрашу азагында Рөстәм Миңнеханов хәбәр иткәнчә, бүгенге визит – Татарстан-Куба мөнәсәбәтләренең яңа дәрәҗәсенә күчүдә бик әйбәт мөмкинлек.
Татарстан ягыннан очрашуда Татарстан Республикасы Премьер-министры Илдар Халиков, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Равиль Зарипов, Татарстан Республикасы Президенты ярдәмчесе Радик Гыйматдинов, Татарстан Республикасы Инвестицион үсеш агентлыгы җитәкчесе Талия Миңнуллина, «Татнефть» ААҖ генераль директоры Наиль Маганов, «Казан вертолет заводы» (КВЗ) генераль директоры Вадим Лигай һәм башкалар катнашты.