Татарстанда 2009 елның 15 нче декабреннән 2010 елның 10 нчы гыйнварына кадәр махсус янгынга каршы тору режимы кертеләчәк

Татарстан Республикасында 2009 елның 15 нче декабреннән 2010 елның 10 нчы гыйнварына кадәр махсус янгынга каршы тору режимы кертеләчәк. Бүген хокук мәсьәләләре буенча ведомствоара координация комитеты һәм Татарстан Республикасы Гадәттән тыш хәлләрне кисәтү, бетерү һәм янгын куркынычсызлыгын тәэмин итү комиссиясенең уртак утырышында бу турыда Татарстан Республикасының янгын күзәтчелеге буенча баш дәүләт инспекторы Таһир Кәримуллин хәбәр итте.
Утырыш, барлык муниципаль районнарны тоташтырып, видеоконференцэлемтә режимында узды. Аны Татарстан Республикасы Премьер-министрының беренче урынбасары Равил Моратов үткәрде.
Таһир Кәримуллин янгын чыгу очракларының күбесе нәкъ менә Яңа ел бәйрәмнәренә туры килүен искәртте. Әйтик, 2009 елның 1 нче декабреннән 31 нче гыйнварына кадәр 828 янгын чыгу очрагы булган, анда 90 кеше (ягъни республикада янгыннарда ел буена һәлак булганнарның 38 проценты) үлгән.
2009 елның 1 нче декабренә алынган мәгълүматларга караганда, барлыгы 238 кеше һәлак булган.
Татарстан Республикасының янгын күзәтчелеге буенча баш дәүләт инспекторы 9 нчы – 11 нче декабрьдә республикада 95 күңел ачу урыны – төнге клублар, рестораннар, кафелар тикшерелүен әйтте (Татарстанда барлыгы 88 төнге клуб бар, ләкин тикшерү кафе һәм рестораннарда, кешеләр күпләп җыела торган башка урыннарда да үткәрелгән). 747 янгын куркынычсызлыгы таләпләрен бозу очрагы теркәлгән. Моңа, барыннан да элек, янгын вакытында чыгу юлларын томалау, тәрәзә рәшәткәләрен чамадан тыш беркетеп кую һ.б. керә.
Тикшерелгән 21 объектта янгын сүндерү җайланмалары табылмаган, 6 объектның эвакуация вакытында чыгу юллары булмаган.
Тикшерүләр нәтиҗәсендә дәүләт хезмәтендәге 67 кеше һәм 11 юридик зат административ җаваплылыкка тартылган.