Татарстанның мәгариф һәм фән министры Альберт Гыйльметдинов: “Алгарыш” Россия һәм чит ил белем бирү һәм фәнни үзәкләрендә кадрлар әзерләү программасы дәвам ителәчәк

2010 елда Татарстан Республикасы Россия һәм чит ил белем бирү һәм фәнни үзәкләрендә кадрлар әзерләү программасын (“Алгарыш” программасы) дәвам итәчәк.
Бүген бу турыда Татарстан Республикасы мәгариф һәм фән министры Альберт Гыйльметдинов Россия һәм чит ил белем бирү һәм фәнни үзәкләрендә кадрлар әзерләү һәм яңадан әзерләү комиссиясе утырышы ахырында хәбәр итте.
Утырыш Татарстан Республикасы Премьер-министры Рөстәм Миңнеханов җитәкчелегендә узды.
Альберт Гыйльметдинов хәбәр иткәнчә, ел саен программа кысаларында 450 дән алып 600 гә кадәр кеше белем ала.
Шулай итеп, 2009 елда әзерләү һәм яңадан әзерләү җиде юнәлеш буенча алып барылды. Бу – студентлар, аспирантлар һәм яшь галимнәр (84 кеше), профессор-укытучылар составы (19 кеше), дәүләт һәм муниципаль хезмәткәрләре (65 кеше), югары һәм урта звено җитәкчеләре (95 кеше), инглиз теле укытучылары (123 кеше), проект төркемнәре (нанотехнологияләр) (12 кеше), физик культура, спорт һәм туристлык өлкәсе белгечләре (30 кеше).
Гомумән алганда, 2009 елда программа 428 кеше керткән (шулар арасыннан 253 – Россия югары белем бирү йортлары һәм фәнни үзәкләрдән, калганнары – чит иллләрдән).
Финанслауның тулаем күләменең (120 млн. сум) яртысыннан артык студентларга, аспирантларга һәм яшь галимнәргә туры килде (63,7 млн. сум).
Студентлар һәм аспирантлар укытуның уртача бәясе 300 меңнән алып (Россиядә) 800 меңгә кадәр сум тәшкил итә.
2009 елда грант алучылар Германия (97 кеше), АКШ (34 кеше), Бөек Британия (22 кеше), Швейцария (9 кеше), Израиль (4 кеше), Франция (3 кеше), Испания, Италия, Финляндия, Голландия кебек илләрдә белем алганнар.
Альберт Гыйльметдинов студентлар, аспирантлар һәм яшь галимнәрнең икътисад, идарә итү, биология, төзелеш һәм архитектура, экология, мәгълүмати технологияләр, техник һәм табигый-фәнни дисциплиналар кебек юнәлешләр буенча белем алуын хәбәр итте.
Ул шулай ук “Алгарыш” программасының чыгарылыш студентларының барысының да диярлек эшкә урнашканын хәбәр итте.
“Икенче мәсьәлә – безнең яшь кадрларның нинди позицияләрдә эшкә урнашуы, - дип әйтте Альберт Гыйльметдинов. – Аларның потенциалы җитәрлек дәрәҗәдә югары, әмма аларга базарда азрак тәкъдим итүләре мөмкин. Шул сәбәпле хезмәт ресурсларын адекват рәвештә оештыру белән кайвакыт проблемалар килеп чыга.”
Грант алучыларның бер өлеше, стажировка үткәч һәм югары уку йортын тәмамлагач, аспирантурада белем алуны дәвам итә.
2010/2011 уку елларында ничә кешене белем алырга җибәрү күздә тотыла соравына җавап биргәндә, Татарстан Республикасы мәгариф һәм фән министры моның финанслау күләменнән торуын әйтте. Әлегә акча бүлеп бирү мәсьәләсе турында сөйләшмәдек, без бүген 2009 елга нәтиҗәләр ясадык, дип әйтте ул. “Шунысы билгеле: бүген конструктив рәвештә фикер алышу узды, “Алгарыш” программасы дәвам ителәчәк һәм үстереләчәк,” – дип хәбәр итте Альберт Гыйльметдинов.