2010 елда Татарстанда яшәүче 98 мең кешене иҗтимагый эшләргә урнаштыру планлаштырыла

2010 елда Татарстан Республикасында Глобаль финанс кризисы йогынтысының тискәре нәтиҗәләрен җиңеп чыгу буенча кисәтү чаралары региональ программасын тормышка ашыру 3 миллиард сум тәшкил итәчәк. Мондый мәгълүмат бүген Татарстан Республикасы Министрлар Кабинетында Татарстан Республикасы Премьер-министрының беренче урынбасары Равил Моратов үткәргән Тормыш дәрәҗәсен күтәрү һәм керемнәрне легальләштерү буенча республика ведомствоара комиссиясе утырышында китерелде.
Киңәшмәдә китерелгән мәгълүмат буенча, 2010 елга Татарстан Республикасының хезмәт базарындагы киеренкелекне киметүгә юнәлтелгән өстәмә чаралар региональ программасы Татарстан Республикасы Президенты әмере буенча расланды һәм Россия Федерациясе Хөкүмәтенә җибәрелде.
2009 елның 28 нче декабре көнне Россия Федерациясе Хөкүмәте рәисе урынбасары Александр Жуков янындагы утырышта республика өчен кирәк булган 2985,3 млн. сум күләмендә бюджет финанс ресурсларының гомуми күләме расланды, шул исәптән Татарстан Республикасы бюджетыннан – 209,6 млн. сум, Россия Федерациясе бюджетыннан – 2775,7 млн. сум.
2010 елда предприятиеләр – программада катнашучылар исемлеге тармак министрлыклары гаризалары буенча формалаштырылган.
2010 елда программаны тормышка ашыруның яңа юнәлеше – инвалидлар өчен эш урыннарын булдыруны субсидияләү барлыкка килде. Татарстанда мөмкинлекләре чикле 200 кешене эшкә урнаштыруда ярдәм итү планлаштырыла.
Программаны тормышка ашыруның төп юнәлеше буларак, элеккегечә, иҗтимагый эшләр калачак. 63 мең эш урыннарына Татарстанда яшәүче 98 мең кешене урнаштыру планлаштырыла.
2010 елда эштән азат ителү куркынычы янаган очракта, Татарстанда яшәүче 9006 кеше алдан ук һөнәри белем алачак, белем бирү учреждениеләре чыгарылыш укучыларының эш тәҗрибәсен алу максатыннан 2578 кеше стажировка узачак.
Шулай ук кече эшмәкәрлекне һәм эшсез гражданнар үзмәшгульлеген үстерүдә ярдәм күрсәтеләчәк, бу 19 мең яңа эш урыны белән тәэмин итү мөмкинлеген булдырачак. Эш эзләү максатыннан мәшгульлек хезмәте органнарына мөрәҗәгать иткән 200 кешегә адреслы ярдәм күрсәтү планлаштырыла.