Рөстәм Миңнеханов Давоста берничә эшлекле очрашу уздырачак

Бүген Татарстан Республикасы Премьер-министры Рөстәм Миңнеханов Давоста (Швейцария) берничә эшлекле очрашу уздырачак.
Рөстәм Миңнеханов җитәкчелегендә Татарстан Республикасы делегациясенең 27-29 нчы гыйнвар көннәрендә Давоста 40 нчы Бөтендөнья икътисади форум эшендә катнашуын искәртәбез.
Кичә, 27 нче гыйнвар көнне, Татарстан Хөкүмәте башлыгы һәм аны озатып баручы затлар Бөтендөнья икътисади форумны тантаналы ачуда (Congress Centre, Congress Hall, Davos) катнаштылар.
Тантаналы чара тәмамлануга Давостагы форумга нигез салучы Клаус Шваб әфәнде исенменнән кичке аш узды (Hotel Morosani).
Бүген, 28 нче гыйнвар көнне, Татарстан Республикасы Премьер-министры Рөстәм Миңнеханов “Сбербанк” ААҖ нең эшлекле иртәнге ашында катнаша (Arabella Sheraton Hotel Seehof). Монда “Киләчәккә караш: дөнья һәм Россия өчен кризис сабаклары” кебек тема турында фикер алышу күздә тотыла.
Алга таба Рөстәм Миңнехановның Кытайның Экспорт-Импорт банкы (The Export-Import Bank of China) рәисе Ли Руогу әфәнде белән очрашуы узачак.
28 нче гыйварның беренче яртысында Рөстәм Миңнехановның шулай ук “Даймлер АГ” (Daimler AG) концернының директорлар советы әгъзасы, Daimler Trucks юнәлеше җитәкчесе Андреас Реншлер белән сөйләшүләре планлаштырылган. Сөйләшүләрдә “КамАЗ” ААҖ генераль директоры Сергей Когогинның да катнашуы күздә тотыла.
Тышкы икътисади эшчәнлек буенча Татарстан Республикасы Премьер-министры ярдәмчесе Искәндәр Мөфлиханов хәбәр иткәнчә, алга таба Рөстәм Миңнеханов һәм Татарстан делегациясе әгъзалары үсеп килә торган илләр үсешен күзәтүгә (The New Growth Narrative) һәм глобаль идарә итү мәсьәләләренә (Global Governance Redesigned) багышланган Давос форумының пленар утырышларында катнашачаклар.