Кризис Татарстан Респубикасының юл сферасында эре проектларны тормышка ашырырга комачау итмәс, дип саный Рөстәм Миңнеханов

Дөнья финанс кризисына карамастан, Татарстанда юл сферасындагы эре проектларны тормышка ашыру дәвам итәчәк. Татарстан Республикасы Премьер-министры Рөстәм Миңнеханов бүген бу турыда Татарстан Республикасы Транспорт һәм юл хуҗалыгы министрлыгының “2009 елда транспорт комплексы эше нәтиҗәсе һәм 2010 елга бурычлар турында” коллегиясендә белдерде.
Татарстан Республикасы Хөкүмәте башлыгы фикеренчә, 2010 елда иң мөһим бурычларның берсе булып 2013 елгы Универсиаданың инфраструктура объектларында эшне көчәйтү санала. Гаять зур күләмдә эшне башкарып чыгарга кирәк булачак – бу максатларда 10 млрд. сум акча бүленеп бирелә.
Шулай ук Зөя регионара мультимодаль логистик үзәген төзү һәм Казан аэропортын модернизацияләү эшләре дәвам итәчәк. Тагын бер эш юнәлеше – торак пунктларга каты өслекле юллар китерү. Татарстанда әле 900 торак пунктка каты өслекле юллар китерелмәгән.
Рөстәм Миңнеханов коллегиядә катнашучыларга 11 февральдә Россиянең Премьер-министры Владимир Путин катнашында “Соллерс” һәм “FIAT” компанияләренең елына 500 мең автомобиль җитештерү егәрлекле уртак автопредприятиесен төзү турында меморандумга кул куелганын искә төшерде. Аның сүзләренә караганда, яңа завод зур күләмдә йөк күчерүне таләп итәчәк һәм перспективада тимер юл һәм автотранспорт арасында йөк ташу балансын булдырырга кирәк булачак.
Татарстан Республикасы Премьер-министры юл хәрәкәте куркынычсызлыгы мәсьәләләре аеруча актуаль булып калуын һәм аны полимерлар белән генә юлларны тәртипкә китерергә ярамавын белдерде. Хәзерге вакытта Казанда гына да видеофиксация системалары ярдәмендә елына 700 мең хокук бозу очрагы теркәлә. Кардиналь рәвештә машина йөртүчеләрне әзерләү сыйфатын арттырырга һәм юлда йөрү кагыйдәләрен үтәүне контрольдә тотуны көчәйтергә кирәк.