Татарстан Республикасы Премьер-министры Рөстәм Миңнеханов: Республика "Fiat - Sollers" автозаводын төзү проектын тормышка ашырырга тели

Татарстан Республикасында "Fiat - Sollers" автозаводын төзү һәм автокомпонентларны китерүчеләр паркын үстерү мәсьәләләре бүген ТР Хөкүмәт Йортында каралды.

Киңәшмәне Премьер-министр Рөстәм Миңнеханов уздырды.

Февральдә "Sollers" компаниясе һәм "Fiat" концерны тарафыннан Россиядә автомобильләр төзү буенча уртак предприятие булдыру турында килешүгә кул куелды. Документка кул кую тантанасында Россия Хөкүмәте рәисе Владимир Путин катнашты.

Бүгенге киңәшмәдә "Fiat" концерны вәкилләре яңа компаниянең җитештерү һәм проект-конструктор концепциясе белән таныштырды. Яңа җитештерү мәйданнары инфраструктура, тимер һәм автомобиль юлларына тоташу мөмкинлеге, шулай ук, кеше ресурслары кебек таләпләргә җавап бирергә тиеш.

Татарстан Премьер-министры Рөстәм Миңнеханов әлеге проектны Татарстан территориясендә тормышка ашырылуын теләгәнен белдерде. Аның сүзләренчә, болай эшләнсә, автокомпонент базасын актив рәвештә үстерергә, яңа автомобиль кластерын булдырырга мөмкин булачак. Ул "Fiat" һәм "Sollers" вәкилләрен Татарстан җитәкчелеге проектка һәрьяклап ярдәм күрсәтәчәгендә ышандырды.

Рөстәм Миңнеханов җаваплы йөзләргә яңа заводның җитештерү мәйданнарын республика территориясендә урнаштыру вариантларын уйларга кушты.

Киңәшмәдә "Sollers" компаниясенең түбәндәге вәкилләре катнашты: "Sollers" компаниясе генераль директоры Вадим Швецов, "Sollers-Алабуга" генераль директоры Гадел Ширинов. "Fiat" концерныннан - бизнесны үстерү буенча өлкән вице-президент Сильвия Вернетти, бизнесны үстерү буенча вице-президент Эцио Бара, ТР сәнәгать һәм сәүдә министры Равил Зарипов, ТР икътисад министры Марат Сафиуллин, ТР төзелеш, архитектура һәм торак-коммуналь хуҗалыгы министры Марат Хөснуллин, ТР финанслар министры Радик Гайзатуллин, ТР хезмәт, халыкны эш белән тәэмин итү һәм социаль яклау министры Айрат Шәфигуллин һәм башкалар.

http://116auto.ru/news/265087.html - "Fiat - Sollers" автозаводы проекты турында