Татарстан Республикасы Президенты Рөстәм Миңнеханов Кама Аланында берничә объектны карады

Татарстан Республикасы Президенты Рөстәм Миңнеханов Кама аръягы зонасына эшлекле сәфәре кысаларында бүген Кама Аланында берничә объектны карады.

Республика җитәкчесе, биредә 2009 елда ачылган ике җитештерүгә старт биреп, "Кама Аланы" индустриаль паркы эшчәнлеге белән танышты. Әлеге җитештерүләр - мультифиламент полипропилен җепләр җитештерүе (елына 1 мең тонна) һәм стретч-тасма җитештерүе (елына 9 мең тонна).

"Кама Аланы" индустриаль паркына инвестицияләр күләме 2009 елда 484 млн. сум тәшкил иткән.

2010 елда яңа проектларга 400 млн. сум акча бүлеп бирү каралган. Биредә полимер челтәр җитештерүе (елына 1440 тонна), стретч-тасма җитештерүе (елына 15 мең тонна), шулай ук, экологик яктан чиста булган агач пластмассасы җитештерүе (елына 1440 тонна) оештырылачак.

2015 елга кадәр индустриаль парк үсешенә тагын 700 млн. сум акча кертү каралган. Парк территориясендә келәм эшләнмәләрен җитештерү оештыру планлаштырыла (елына 11 мең тонна).

ТР Президенты Рөстәм Миңнеханов, шулай ук, Кама Аланының дәүләт һәм муниципаль хезмәтләр күрсәтү буенча күпфункцияле үзәген карады. Үзәк 2009 елның августында ачылган иде. Бүген биредә тугыз хезмәт урнашкан: Федераль теркәү хезмәтенең ТР буенча идарәсе, РФ Пенсия Фондының ТР буенча идарәсе, социаль яклау идарәсе, Федераль салым хезмәтенең ТР буенча идарәсе һ.б.

Әлеге үзәккә килгәч Рөстәм Миңнеханов бистә халкы белән аралашты. Килүчеләрнең күбесе пенсионерлар иде. Алар бистәдә җәмәгать мунчасының эшләмәве, җәмәгать транспортының начар йөрүеннән зарланды.

Соңрак Татарстан Президенты Кама Аланы бистәсендә төзелгән "Олимпия" боз сараена китте. Кама Аланы муниципаль берәмлеге башлыгы Игорь Привалов боз сараеның яшьләр арасында популяр булганын җиткерде. Биредә тимераякта шуу оештырылган, спорт секцияләрендә дәресләр бара.

Кама Аланы хастаханәсен заманчалаштыру перспективалары турында ТР Президентына ТР сәламәтлек саклау министры вазифаларын башкаручы Айрат Фәррахов сөйләде. Аның сүзләренчә, хастаханә бистәдә яшәүче 15 мең халыкка гына түгел, тирә-юньдә урнашкан 30 торак пункты халкына да хезмәт күрсәтә.

Биредә 40 табиб һәм 173 урта медперсонал хезмәткәре эшли. Айрат Фәррахов сүзләренчә, хастаханәне төзекләндерү, кабул итү бүлеген заманчалаштыру һ.б. эшләрне башкарырга кирәк. Бер вариант буенча хастаханә төзекләндерелгәннән соң һәм бирегә тиешле җиһазлар кайтартылганнан соң, хастаханә мәйданы икеләтә кимиячәк. Буш калган биналар белән исә бистәнең торак фондын тулыландырырга мөмкин.

ТР Президенты хастаханәне заманчалаштыру вариантын һәм буш калган мәйданнарны бюджет өлкәсендә эшләүчеләргә бирү проектын хуплады.

ТР сәламәтлек саклау министры вазифаларын башкаручы Айрат Фәррахов Рөстәм Миңнехановка Кама Аланында заманча тернәкләндерү үзәге проектын да тәкъдим итте. Әлеге үзәкне төзелеп бетмәгән мәктәп нигезендә оештыру планлаштырыла.

Алга таба Татарстан Президенты Кама Аланы муниципаль берәмлеге администрациясендә "Кама Аланы" индустриаль паркын үстерү мәсьәләләре буенча киңәшмә үткәрде. Киңәшмәдә "Түбән Кама нефтехим" ААҖ генераль директоры Владимир Бусыгин чыгыш ясады.