Татарстан Президенты Рөстәм Миңнеханов: гражданнарны хәрби хезмәткә иң яхшы әзерләүчеләрне ачыклау максатыннан үткәрелгән конкурста республика үзен лаеклы дәрәҗәдә күрсәтергә әзер

Татарстан Республикасы яшьләрне хәрби хезмәткә әзерләү өлкәсендә новатор төбәк булып тора.

Ул хакта бүген Татарстан Президенты Рөстәм Миңнеханов белән очрашуда РФ субъектлары арасында гражданнарны хәрби хезмәткә иң яхшы әзерләүчеләрне ачыклау максатыннан үткәрелгән бәйгегә нәтиҗә ясау буенча Үзәк конкурс комиссиясе рәисе Сергей Николенко белдерде.

Конкурс 2009 ел нәтиҗәләре буенча үткәрелә. Татарстан әлеге конкурста инде дүртенче тапкыр катнаша.

Сергей Николенко Татарстанның федерация субъектларыннан беренче булып армиягә китүче егетләрен кесә телефоннары һәм "гаскәр букчалары" белән тәэмин итә башлаганын билгеләп үтте. Моннан кала, республика җитәкчелеге балалары башкалар белән бергә - бертигез шартларда хезмәт итә. Мондый күренеш фәкать Татарстанда гына күзәтелә.

Сергей Николенко сүзләренчә, Татарстан Республикасында чакырылучы егетләрнең күбесе югары һәм махсус урта белемгә ия. Әлеге күрсәткеч барлык чакырылучыларның 56%ын тәшкил итә (Россиядә исә әлеге сан - 17%).

Сергей Николенко, шулай ук, Татарстанның Россия оборона спорт-техника оешмасын (РОСТО (ДОСААФ)) иҗтимагый-дәүләти берләшмә буларак үстерү идеясен хуплаган беренче төбәк булганын искә төшерде.

Татарстан Республикасы Президенты Рөстәм Миңнеханов очрашу барышында гражданнарны хәрби хезмәткә әзерләү, чакырылышны оештыру һәм үткәрү буенча РФ оборона министрлыгы конкурсының илнең яклану сәләтен арттыручы җитди дәүләти проект булганын ассызыклады.

Бүген без системалы рәвештә башкарылган эшләребезнең җимешләрен күрәбез, диде Рөстәм Миңнеханов. Аның фикеренчә, чакырылыш яшендәге гражданнарны хәрби-учет белгечлекләре буенча әзерләү, бер яктан, югары уку йортларын студентлар белән тәэмин итә, икенче яктан, яшьләргә армиягә әзерләнгән килеш барырга мөмкинлек бирә.

Яшьләр белән эшләү - хәрби-патриотик тәрбиянең бер өлеше ул. Татарстан Президенты сүзләренчә, республикада бу өлкәдә тулы бер система төзелгән. Бездә кадет сыйныфлары һәм кадет мәктәпләре эшли, хәрби училищелар, Суворов училищесына ярдәм күрсәтелә, "Патриот" республика спорт-патриотик үзәге үсеш ала.

РФ оборона министрлыгы үткәрә торган конкурста республика үзен лаеклы дәрәҗәдә күрсәтергә әзер, диде Рөстәм Миңнеханов.

Татарстан Президенты Татарстанның элегрәк РФ оборона министрлыгына республикада Бөтенроссия хәрби спартакиада үткәрү идеясе белән чыкканын искә төшерде. Без 2013 елда Казанда узачак Бөтендөнья җәйге Универсиадага әзерләнәбез. Республикада бик күп заманча спорт объектлары бар. Аларны эшкә җигәргә, сынап карарга кирәк, диде Рөстәм Миңнеханов.

"Без сезнең ышанычлы партнерларыгыз булырга телибез, - диде Рөстәм Миңнеханов. - Татарстанның чакырылышны үтәп кенә калмыйча, аны сыйфатлы итеп башкарганын күрсәтергә телибез. Республика җитәкчелегенең чакырылышка һәм Хәрби көчләргә булган җитди мөнәсәбәте алга таба да сакланачак һәм тагы да көчәячәк".

Очрашуда ТР Премьер-министры вазифаларын башкаручы Равил Моратов, ТР хәрби комиссары Сергей Погодин, ТР Президент аппараты җитәкчесе урынбасары Булат Зиннуров һәм башкалар катнашты.

Очрашудан соң ТР Премьер-министры вазифаларын башкаручы Равил Моратов, журналистлар сорауларына җавап биргәндә, 2009 елда республикада хәрби-учет белгечлекләре буенча 5 мең кеше әзерләнгәнен хәбәр итте. 2010 елда әлеге санны 10 меңгә җиткерергә планлаштырыла.